Rayon Sports yongeye gutakaza amanota ku mukino w’Umunsi wa Cyenda wa Shampiyona nyuma yo kunganya na Gicumbi FC igitego 1-1, mu mukino wabereye kuri Kigali Pele Stadium ku mugoroba wo ku wa Gatandatu.
Ni umukino wari witezwe na benshi bitewe n’ibihe bitari byiza Rayon Sports imaze iminsi irimo, haba mu kibuga no hanze yacyo.
Igice cya mbere cyarangiye amakipe yombi anganya 0-0, buri ruhande rugaragaza ubushake ariko bikabura umusaruro.
Gicumbi FC ni yo yabanje kwiharira iminota itandukanye, cyane cyane ubwo Bahati Clement na Lola Kanda bari bari gukoresha imyanya ya Rayon Sports mu kuyugariza.
Gusa abakinnyi nka Ndayishimiye Richard na Sindi Paul Jesus bagerageje kwinjiza Gikundiro mu mukino, nubwo uburyo bwinshi bwavaga mu bakinnyi ba Haruna Ferouz butabyaye umusaruro.
Igice cya kabiri kitarangira, imvune ya Ahishakiye Heritier yatumye Gicumbi ihita ikora impinduka itateganyije, ituma Iti Ndiho Agape yinjira mu izamu.
Ku munota wa 61, nibwo ibyishimo bya Gicumbi byabonetse biturutse kuri Rubuguza Jean Pierre wateye ishoti rikomeye mu rubuga rw’amahina, Mugisha Yves ananirwa gukuramo umupira maze ujya mu izamu
Rayon Sports yahise ikanguka, irushaho gusatira ariko igorwa no kubona inzira zijya imbere y’izamu. Impinduka zakozwe na Ferouz, zirimo kwinjiza Habimana Yves na Ndikumana Asman, zagaragaje impinduka mu mikinire.
INDI NKURU WASOMA :Hatangajwe abagomba gufatanya na Minisitiri Nelly Mukazayire
Ku munota wa 84, Asman yashyize mu izamu umutwe mwiza ku mupira wari uvuye kuri coup franc ya Tony Kitoga, yishyura igitego cyari cyatsinzwe.
Iminota ya nyuma y’umukino yaranzwe n’igitutu kuri Gicumbi FC, umunyezamu Agape agera aho atanga umupira nabi ariko amahirwe ya Rayon Sports ntiyabyara igitego cya kabiri. Umusifuzi yongereyeho iminota itanu, ariko ntacyo yahinduye kuri 1-1.
Nyuma y’uyu mukino, Rayon Sports yujuje imikino itatu yikurikiranya idatsinda, ikaba ifite amanota 14 ku mwanya wa gatanu. Gicumbi FC yo yageze ku manota 9, ikomeza urugendo rwo gushaka gusohoka mu myanya ya nyuma.
Umukinnyi w’umukino yabaye Ndayishimiye Richard wa Rayon Sports, waheawe igihembo cy’ibihumbi 100 Frw kubera uruhare rwe mu kurinda hagati no gutanga imipira ifite ireme.
Mu yindi mikino, Amagaju FC yatsindiwe i Huye na Gasogi United igitego 1-0, mu gihe Rutsiro FC yatsindiwe na AS Muhanga igitego kimwe ku busa i Rubavu.
Must See
