APR FC yegukanye Super Cup ya 2025 inyagiye Rayon Sports

FERWAFA SUPER CUP : APR FC 4-1 Rayon Sports

Ikipe ya APR FC yegukanye igikombe cya Super Cup ya 2025 nyuma yo gutsinda Rayon Sports ibitego 4-1, mu mukino wabereye kuri Stade Amahoro ku mugoroba wo kuri uyu wa Gatandatu.

Ni umukino wari witabiriwe n’abafana benshi bagera hafi ku bihumbi 40, bawuryohewe n’imikinire myiza y’impande zombi, nubwo APR FC yaje kuwuganza mu buryo bugaragara.

Nubwo APR FC yakomeje kwiharira umupira no kurema uburyo bwinshi, yabanje kujya igorwa no kububyaza umusaruro, ndetse inabona penariti itavuzweho rumwe ku ikosa Memel Dao yakorewe mu rubuga rw’amahina.

Ku munota wa 20, APR FC yafunguye amazamu ku gitego cya William Togui, nyuma y’ikosa ry’umunyezamu Kwizera Olivier.

Nyuma y’iminota mike, Ikipe y’Ingabo z’Igihugu yakomeje kotsa igitutu Rayon Sports, ku munota wa 43 Ronald Ssekiganda atsinda igitego cya kabiri akoresheje umutwe, bituma amakipe ajya kuruhuka APR FC iyoboye n’ibitego 2-1.

INDI NKURU WASOMA :APR yatandukanye n’umutoza wayo

Mu gice cya kabiri, APR FC yakomeje kugaragaza ubudahangarwa n’ubunyamwuga. Ku munota wa 70, Dauda Yussif yatsinze igitego cya gatatu nyuma yo gucenga myugariro akanacenga umunyezamu, ashyira umupira mu rushundura. Rayon Sports yakomeje gushaka uko yagaruka mu mukino ariko ikomeza kugorwa n’ubwugarizi bukomeye bwa APR FC.

Ku munota wa 90+3, Rayon Sports yabonye igitego cy’ihumure cyatsinzwe na Ndikumana Asman, ariko bidatinze ku munota wa 90+4 Mamadou Sy atsinda igitego cya kane cya APR FC nyuma yo guhabwa umupira na Ruboneka Jean Bosco, acenga Kwizera Olivier.

Umukino warangiye APR FC itsinze ibitego 4-1, ihita yegukana igikombe cya Super Cup ya 2025, ikomeza kwerekana ko igihagaze neza mu mupira w’amaguru w’u Rwanda, mu gihe Rayon Sports ifite umukoro wo gukomeza guhuza abakinnyi bashya no kongera imbaraga mu mikino iri imbere.