PSG yegukanye igikombe cya gatandatu muri uyu mwaka

Ikipe yo mu Bufaransa, Paris Saint-Germain (PSG), yakomeje kwandika amateka meza mu mwaka wa 2025 yegukana igikombe cya gatandatu, nyuma yo gutsinda CR Flamengo yo muri Brésil ku mukino wa nyuma w’Igikombe Mpuzamigabane cya FIFA (FIFA Intercontinental Cup).

 Uyu mukino wabereye kuri Stade Ahmad bin Ali i Al Rayyan muri Qatar, ku wa Gatatu.PSG yatsinze Flamengo ibitego 2-1 nyuma yo kunganya 1-1 mu minota 90, maze hakitabazwa penaliti.

Nubwo intsinzi yabonetse, umukinnyi w’Umunya-Koreya y’Epfo, Lee Kang-in, ntiyabashije kuwisoza ari mu kibuga kubera imvune yagiriye hagati mu mukino.

Igikombe cya Intercontinental Cup gihuza amakipe yatwaye ibikombe ku migabane itandatu ya FIFA: Afurika, Aziya, Uburayi, Amerika ya Ruguru n’iyo hagati, Oseyaniya na Amerika y’Epfo.

INDI NKURU WASOMA:Ibikubiye mu masezerano ya Bruno Ferry na Rayon Sports

Nk’uko bisanzwe, uhagarariye Uburayi ahita ajya ku mukino wa nyuma, kandi PSG yari ifite uwo mwanya nyuma yo gutwara UEFA Champions League.

Uyu wabaye umwaka udasanzwe kuri PSG kuko yongeyeho iki gikombe ku bindi birimo Ligue 1, Coupe de France, Trophée des Champions, UEFA Champions League na UEFA Super Cup.

Lee Kang-in yari yabanje mu kibuga hagati mu bakinnyi bo hagati, ariko ku munota wa 35 asimburwa na Senny Mayulu nyuma yo kugira ikibazo cy’imitsi yo ku kibero cy’ukuguru kw’ibumoso. Ibi byabaye nyuma yo kugongana na Gonzalo Plata, agwa nabi maze ava mu kibuga agendeshejwe n’umutoza w’abavuzi.

PSG yafunguye amazamu ku munota wa 38 ku gitego cya Khvicha Kvaratskhelia, ariko Flamengo iza kwishyura ku munota wa 62 ku mupira wa penaliti watsinzwe na Jorginho.

Mu guhatanira penaliti, umunyezamu wa PSG, Matvei Safonov, yabaye intwari aho yahagaritse penaliti enye zikurikiranye.

 Vitinha na Nuno Mendes batsindiye PSG, mu gihe Nicolas de la Cruz ari we wenyine watsindiye Flamengo, abandi barimo Saul Niguez, Pedro, Leo Pereira na Luiz Araujo barazirata.