Ku wa Gatanu tariki ya 9 Mutarama 2026, Manchester City yatangaje ku mugaragaro ko yamaze gusinyisha rutahizamu mpuzamahanga wa Ghana, Antoine Semenyo, imukuye mu ikipe ya Bournemouth ku mafaranga agera kuri miliyoni 64 z’amapawundi.
Uyu mukinnyi w’imyaka 26 yasinyiye City amasezerano y’imyaka itanu n’igice, akazambara nimero 42.
Aya masezerano atumye Manchester City igera ku mafaranga angana na miliyoni 425.9 z’amapawundi yakoreshejwe mu kugura abakinnyi 14 mu mezi 12 ashize, ibintu bikomeza kwerekana ubushobozi n’icyerekezo iyi kipe ifite ku isoko ry’igura n’igurisha ry’abakinnyi.
Nubwo Semenyo yari wifuzwa n’amakipe akomeye arimo Manchester United, Liverpool, Chelsea na Tottenham, yahisemo Manchester City ku bushake bwe.
Umuyobozi ushinzwe umupira w’amaguru muri City, Hugo Viana, yavuze ko Semenyo yahise agaragaza ko yifuza gukinira iyi kipe ya Pep Guardiola, agaragaza umuhate n’ishyaka bikomeye.
Bournemouth izabona amafaranga yizew angana na miliyoni 62.5 z’amapawundi azishyurwa mu byiciro mu gihe cy’amezi 24, hakiyongeraho bonus ya miliyoni 1.5 bitewe n’imikino azitwara, ndetse n’ijanisha rya 10 ku gihe cyose azaba agurishijwe ahandi.
INDI NKURU WASOMA: Yimwenyurira Kirasa yanenze inzitwazo z’umutoza wa APR Fc
Nubwo amasezerano ye yari afite ingingo yo kumugura kuri miliyoni 65, impande zombi zumvikanye ku mafaranga make gato ariko arenze ayo Bournemouth yari yarahawe mu mpeshyi ishize.
Semenyo asize Bournemouth amaze gutsinda ibitego 10 anatanga imipira 3 yavuyemo ibitego muri Premier League muri uyu mwaka w’imikino.
Mu mukino we wa nyuma yakiniye Bournemouth, yatsinze igitego cy’intsinzi ku munota wa nyuma batsinda Tottenham ibitego 3-2, bituma asezera mu buryo butangaje.
Mu magambo ye ya mbere nk’umukinnyi wa Manchester City, Semenyo yavuze ko yishimye cyane, ashimangira ko ari amahirwe akomeye kuri we gukorana na Pep Guardiola no gukinira ikipe yashyizeho amateka akomeye mu mupira w’amaguru w’u Bwongereza n’i Burayi.
Must See
