Mu irushanwa ry’Igikombe cya Afurika cyabaye mu 2025 (AFCON 2025), abafana b’umupira w’amaguru babonye byinshi birenze imikino ikomeye n’ibyishimo byo gutsinda.
Habayeho n’ishusho idasanzwe yabaye ikimenyetso cy’iri rushanwa, ikorwa n’umufana ukomoka muri Repubulika Iharanira Demokarasi ya Congo, Michel Kaku Omangila, uzwi ku izina rya “Lumumba”.
Nubwo ikipe ya DR Congo yasezerewe muri 1/8 cy’irangiza itsinzwe na Alijeriya ku gitego cyatsinzwe ku munota wa 119, uwo mufana ni we warushijeho kwibukwa kurusha abakinnyi benshi.
Mu gihe cyose umukino wamaze, camera zagiye zisubira ku muntu umwe mu bafana, uhagaze, ukuboko kuzamuye, asa n’igishushanyo kizima.
Michel Kaku yari yambaye kandi yitwaye asa neza nk’ishusho ya Patrice Lumumba, intwari y’igihugu cya Congo, wabaye Minisitiri w’Intebe wa mbere kandi akaba ikimenyetso cy’urugamba rwo kwigenga no kwihesha agaciro kwa Afurika.
Mu minota 90 y’umukino no mu yindi yose y’inyongera, ntiyigeze ahindura uko ahagaze cyangwa isura ye. Iyi si imikino y’umunsi umwe, kuko yabikoze mu mikino yose ine DR Congo yakinnye muri AFCON 2025.
Icyakora, ku munota wa 119, ubwo Alijeriya yatsindaga igitego cyasezereye “Leopards”, ibintu byarahindutse. Michel Kaku yaciye amarenga yo kwimuka bwa mbere. Yafashe mu maso, amarira aratemba. Iyo shusho yakwirakwiye ku mbuga nkoranyambaga mu kanya gato, iba imwe mu bihe bikora ku mutima byaranze AFCON 2025.
INDI NKURU WASOMA :U Rwanda ruri kwitegura kwipima na Gabon
Abafana hirya no hino ku Isi bagaragaje ko batabonye gusa umufana udasanzwe, ahubwo babonye ubutumwa bukomeye. Abenshi bavuze ko ari icyubahiro gikomeye yagiriye Patrice Lumumba n’amateka ya Afurika. Ndetse n’abafana ba Alijeriya bagaragaje kumwubaha, bavuga ko basobanukiwe n’uburemere bw’igikorwa cye.
Nta gitego yatsinze, nta mupira yatanze wavuyemo igitego, ariko Michel Kaku Omangila yibukije Isi yose ko umupira w’amaguru muri Afurika atari umukino gusa.
