Ibyitezwe mu gihe AFCON igeze aho umwana arira nyina ntiyumve !

Irushanwa rikomeye ry’umupira w’amaguru ku mugabane wa Afurika, TotalEnergies CAF Africa Cup of Nations Morocco 2025, rigiye kwinjira mu cyiciro kirushijeho gukomera guhera kuri uyu wa Gatandatu, aho hateganyijwe imikino ya 1/8 izamara iminsi ine.

Ni icyiciro aho amakosa atakibabarirwa, kuko amakipe yose aba ahatana ku kuguma mu irushanwa cyangwa gusezererwa burundu.

Nyuma y’icyiciro cy’amatsinda cyaranzwe n’amarangamutima menshi, guhatanira itike kugeza ku munota wa nyuma ndetse n’amateka mashya ku makipe amwe n’amwe, ubu irushanwa rigiye guhindura isura.

Amakipe yakundwaga mbere, ayatwaye igikombe kera ndetse n’ari akinjira bwa mbere muri iki cyiciro, yose aracyafite amahirwe yo kugera ku mukino wa nyuma uteganyijwe kubera i Rabat.

Côte d’Ivoire ifite igikombe giheruka iracyahari, ariko inzira iyitegereje irakomeye. Maroc yakiriye irushanwa ifite igitutu cyinshi cyo kwitwara neza imbere y’abafana bayo, mu gihe ibihangange nka Senegal, Misiri, Nigeria na Algérie byo bishaka kwemeza ko imbaraga bagaragaje mu matsinda zitari impfabusa. Hari kandi amakipe atari yaritezwe nka Sudan, Tanzania na Mozambique, ashaka gukomeza urugendo rwabo rutunguranye.

Imikino izafungura iki cyiciro izabera i Tangier, aho Senegal itaratsinzwe mu itsinda D izahura na Sudan .

INDI NKURU WASOMA :Uko Liam Rosenior azakinisha Chelsea – BYASOBANUWE BYOSE !

Ku Cyumweru, Maroc izacakirana na Tanzania i Rabat, umukino ufite igisobanuro gikomeye kuko Tanzania ari bwo igiye gukina iki cyiciro bwa mbere. Uwo munsi uzasozwa n’umukino w’amateka hagati ya Afurika y’Epfo na Cameroun, urimo inkuru nyinshi zirimo n’umutoza Hugo Broos uzaba ahanganye n’igihugu yigeze guha igikombe.

Ku wa Mbere , Misiri izakomeza urugendo rwo gushaka igikombe cya munani ihura na Benin, mu gihe Nigeria izahura na Mozambique ishaka gukomeza kwitwara neza mu gutsinda ibitego byinshi.

Iyi mikino izasozwa ku wa Kabiri, aho Algérie izahura na RD Congo mbere y’uko Côte d’Ivoire ihura na Burkina Faso mu mukino ushobora kugena icyerekezo cy’irushanwa.