Antoine Semenyo yasezeye abafana ba Bournemouth

PREMIER LEAGUE – CHELSEA 2-2 AFC BOURNEMOUTH

Manchester City iri hafi kurangiza amasezerano yo kugura rutahizamu Antoine Semenyo ukinira Bournemouth ku mafaranga agera kuri miliyoni 65 z’amapawundi, mu isoko ry’igura n’igurisha ryo muri Mutarama.

Ibi byongeye gufata intera nyuma y’uko uyu mukinnyi ukomoka muri Ghana agaragaye asuhuza abafana ba Bournemouth, bimeze nko kubasezera, nyuma y’umukino banganyijemo na Chelsea ibitego 2-2 mu ijoro ryo ku wa Kabiri.

Semenyo ari mu bakinnyi bitwaye neza cyane muri Premier League uyu mwaka w’imikino, aho amaze gutsinda ibitego icyenda anatanga imipira itatu yavuyemo ibitego mu mikino 16 amaze gukina. Uwo musaruro mwiza watumye yifuzwa n’amakipe akomeye mu Bwongereza arimo Manchester City, Liverpool, Manchester United, Chelsea na Tottenham.

Amakuru dukesha ikinyamakuru TalkSport avuga ko Manchester City yamaze kugirana ibiganiro na Bournemouth ku wa Mbere, ikaba ishaka kurangiza aya masezerano vuba bishoboka kugira ngo yongere imbaraga mu busatirizi bwa Pep Guardiola.

INDI NKURU WASOMA :Unai Emery yasobanuye icyamuteye kudasuhuza Mikel Arteta

Semenyo afite ingingo mu masezerano imwemerera kugenda igihe ikipe ishaka kumuha miliyoni 65 z’amapawundi.

Umutoza wa Bournemouth, Andoni Iraola, yatangaje ko Semenyo ashobora gukina umukino wo ku wa Gatandatu bazakiramo Arsenal iyoboye urutonde rwa shampiyona, nubwo hari amakuru avuga ko ashobora kuba agiye kugenda.

Iraola yagize ati: “Si umukino we wa nyuma. Ntekereza ko azakina, ni umukinnyi w’ingenzi cyane kuri twe.”

Manchester City imaze igihe yishingikirije cyane kuri Erling Haaland umaze gutsinda ibitego 19, bityo ikifuza kongeramo undi rutahizamu ufite izamu mu maraso. Biteganyijwe ko ibiganiro hagati ya City na Semenyo bikomeza ku wa Gatatu.

Nubwo City iri imbere mu kumwegukana, Liverpool ntiracika intege, cyane ko umuyobozi wayo ushinzwe imikino, Richard Hughes, ari we wigeze kumujyana muri Bournemouth avuye muri Bristol City mu 2023. Chelsea yo yagerageje gutanga icyifuzo cya nyuma, ariko nyuma iza kwivana muri iyo dosiye.