Basketball : Uwanyuze muri Patriots yabonye ikipe muri Indonesia

Stephaun Branch wahoze akinira ikipe ya Patriots BBC , yamaze gusinyira ikipe ya Bogor Hornbills ikina muri Shampiyona ya Basketball yo muri Indonesia (IBL), ku masezerano y’umwaka umwe.

Iyi kipe ifite icyicaro mu mujyi wa Bogor, ikaba ari iya kabiri Branch agiyemo muri iyi shampiyona, nyuma yo kwitwara neza mu mwaka wa 2025 akinira Tangerang Hawks.

Mu mwaka ushize w’imikino, Branch yagize uruhare rukomeye mu gutuma Tangerang Hawks igera mu mikino ya kamarampaka (playoffs).

Mu mikino 23 ya shampiyona isanzwe, yatsindaga impuzandengo y’amanota 20, akora rebounds 7.8, atanga imipira yavuyemo amano ku kigero cya 5.5 ndetse akora n’ibizw nka steals 2.6 kuri buri mukino.

Uyu mukinnyi uzwi ku izina ry’akabyiniriro “Monster Points”, ategerejweho kongera imbaraga mu busatirizi bwa Bogor Hornbills mu gihe bitegura umwaka w’imikino wa 2026.

Ibinyujije ku mbuga nkoranyambaga zabo ;ubuyobozi bw’iyi kipe bwemeje ko ashobora kuyifasha cyane, cyane cyane mu gutsinda amanota menshi, mu gihe yaba abonye ubufasha buhoraho buturuka ku bakinnyi bategura umukino (point guards).

INDI NKURU WASOMA :OFFICIAL -Liverpool yatandukanye n’umutoza wayo

Mbere yo kujya muri Indonesia, Branch yanyuze mu makipe atandukanye. Mu mwaka w’imikino wa 2017–2018, yakiniye South Bay Lakers, ishami rya Los Angeles Lakers muri G League ya NBA.

Mu 2024, yakiniye RM Valcea yo muri Romania aho yakinnye imikino 29, mbere yo kwerekeza muri Patriots BBC mu Rwanda, aho bafatanyije kugera ku mukino wa nyuma wa Shampiyona ya Basketball y’u Rwanda.

Nyuma yo kurangiza shampiyona ya IBL, Branch yanakiniye Dorados yo muri Mexico mu irushanwa rya LNBP, aho yakinnye imikino irindwi atsinda impuzandengo y’amanota 7 buri mukino.