Nyuma y’iminsi itari mike y’umusaruro muke no kunengwa n’abayobozi bayo, Rayon Sports yongeye guhembura imitima y’abafana bayo itsinda Gorilla FC ibitego 2-1, mu mukino w’umunsi wa 12 wa Shampiyona wabereye kuri Kigali Pelé Stadium.
Uyu mukino wabaye kuri uyu wa Gatanu waranzwe n’ishyaka rikomeye ku ruhande rwa Rayon Sports, yashakaga kugaragaza isura nshya imbere y’umutoza wayo mushya, Bruno Ferry, wari wicaye mu myanya y’abanyacyubahiro areba uko abakinnyi bitwara.
Umukino watangiye amakipe yombi yitwara neza, ariko Rayon Sports igaragaza inyota yo kubona igitego hakiri kare. Ku munota wa 21, myugariro Bayisenge Emery yatsinze igitego cyiza ku mupira w’umuterekano (coup franc), umupira uruhukira mu rushundura rwa Gorilla FC, Gikundiro ihita ijya imbere.
Ibyishimo by’abafana ba Rayon Sports ntibyatinze kugabanyuka, kuko ku munota wa 35, Nduwimana Franck wa Gorilla FC yishyuriye ikipe ye. Yazamutse yihuta atera umupira ukomeye mu izamu, umunyezamu Drissa Kouyaté ntiyabasha kuwugarura, amakipe ajya kuruhuka anganya igitego 1-1.
Mu gice cya kabiri, Rayon Sports yakoze impinduka zitandukanye, harimo gusimbuza Adama Bagayogo na Habimana Yves, ndetse hinjizwa Ishimwe Fiston hagamijwe kongera imbaraga mu busatirizi.
INDI NKURU WASOMA :Rayon Sports yemeye ko iri mu bihe bikomeye
Ku munota wa 65, Rayon Sports yongeye kubona coup franc mu mwanya mwiza. Ndayishimiye Richard, wari witwaye neza cyane muri uyu mukino, yayiteye neza, umupira winjira mu izamu, ashyiramo igitego cy’intsinzi.
Iyi ntsinzi yafashije Rayon Sports kuzamuka ku mwanya wa kane n’amanota 20 mu mikino 12, mu gihe Gorilla FC yagumye ku mwanya wa 10 n’amanota 15.
Mu wundi mukino wabaye mbere y’uyu, AS Kigali yanganyije na Bugesera FC 0-0. Ku wa Gatandatu, Amagaju FC izakira Mukura VS i Huye mu mukino wo kwizihiza isabukuru y’imyaka 90, mu gihe indi mikino irimo Etincelles FC vs Police FC, Musanze FC vs AS Muhanga na APR FC vs Gasogi United.
