Bruno Fernandes azaguma muri Manchester United

Kapiteni wa Manchester United, Bruno Fernandes, nta gahunda afite yo kuva muri iyi kipe muri uku kwezi kwa Mutarama, n’ubwo hari amakuru amaze iminsi avugwa ko ashobora gutekereza ku hazaza he nyuma y’iyirukanwa ry’umutoza mukuru Ruben Amorim.

Mu minsi ishize, byavuzwe ko Fernandes yaba atanyuzwe n’uko ibintu byifashe muri Old Trafford, cyane cyane nyuma y’uko Amorim, wari waramugiriye icyizere, yirukanwe ku nshingano.

Ibyo byakajije umurego ubwo uyu mukinnyi w’imyaka 31 yabonwaga aganira na Carlos Fernandes, umwe mu batoza bakoranaga na Amorim, ibintu byatumye bamwe bibaza niba atari gushaka inzira yo gusohoka muri Manchester United.

Icyakora, amakuru avuga ko n’ubwo habaye impinduka zikomeye mu buyobozi bw’ikipe , aho Darren Fletcher yagizwe umutoza w’agateganyo mu mikino ibiri mbere y’uko Michael Carrick afata inshingano zo gutoza kugeza shampiyona irangiye Bruno Fernandes akomeje kwiyumvamo Manchester United kandi yumva ari ho agomba kuguma muri iki gihe.

Byari bisanzwe mu migambi ye ko azasuzuma uko ahagaze mu mpeshyi, cyane ko azaba asigaje umwaka umwe gusa ku masezerano ye. Ibi bivuze ko nta mwanzuro wihuse ateganya gufata muri Mutarama.

INDI NKURU WASOMA:FRVB yatangaje batanu bagomba kuvamo utoza ikipe y’igihugu

N’ubwo mu mpeshyi ishize Fernandes yanze igitekerezo cy’amafaranga menshi yatangwaga na Al-Hilal, kandi hakaba hakiri inyota ikomeye imukurikirana ituruka muri shampiyona ya Arabie Saoudite, biravugwa ko mu gihe yaba agiye kuva muri United, yakwifuza kuguma gukinira ku mugabane w’u Burayi.

Uyu wahoze akinira Sporting Lisbon aherutse kwemera ko yababajwe no kumenya ko Manchester United yari yiteguye kumugurisha. Yongeyeho ko abayobozi bakuru batagize ubutwari bwo kubimubwira imbonankubone, cyane ko Amorim we yifuzaga ko akomeza kuguma muri iyi kipe.