RPL : APR FC iri kurya isataburenge Police FC  nyuma gutsinda Etincelles FC

Ikipe ya APR FC yitwaye neza itsinda Etincelles FC ibitego 2-1 mu mukino w’ikirarane w’Umunsi wa Gatatu wa Shampiyona y’u Rwanda wabereye kuri Kigali Pelé Stadium, kuri uyu wa Kabiri.

Uyu mukino wari witezwe cyane kuko wari guha APR FC amahirwe yo kwegera Police FC iyoboye urutonde by’agateganyo.

APR FC yatangiye umukino yihuta, yereka abafana bayo ko icyifuzo cyayo ari ugutwara amanota yose kuri uyu mukino.

Ku munota wa 30’ Mamadou Sy yatsinze igitego cyari gutuma batangira kubyina kare, ariko umusifuzi yemeza ko habayemo ukurarira.

Gusa ntiyatezutse ku kongera gushaka uko yabyitwaramo neza, maze ku munota wa 32 afungura amazamu ku mupira mwiza yari ahawe, ashyiramo igitego cya mbere cy’Ingabo z’Igihugu.

Etincelles FC itozwa na Masudi Djuma ntiyacitse intege nubwo yari yatangiye isa nk’iri inyuma. Yagerageje kuguma mu mukino, ariko ubusatirizi bwa APR FC bwakomeje kuyigora, cyane cyane binyuze kuri Mamadou Sy wari uri mu mukino mwiza cyane.

Haburaga amasegonda ngo igice cya mbere kirangire, Djibril Ouattara wari ugarutse mu kibuga nyuma yo gukira imvune yatsinze igitego cya kabiri ku munota wa 45+1. Ni ku mupira mwiza yahawe na Sy, watumye igice cya mbere kirangira APR FC ifite impamba y’ibitego 2-0.

INDI NKURU WASOMA:Hakoreshwa VAR mu gutanga Koruneri mu gikombe cy’isi cya 2026

Mu gice cya kabiri, Etincelles FC yagarutse ihindura imikinire, ibintu byahise biyihesha umusaruro. Ku munota wa 47, Gedeon Ndonga Bivula yatsinze igitego cy’impozamarira nyuma yo kwiharira umupira ba myugariro ba APR FC bananiwe gukuramo neza uvuye muri koruneri.

Iki gitego cyatumye Etincelles iyobora umukino mu minota yakurikiyeho, ishaka uko yabona ikindi gishyira ibintu ku murongo. Ku munota wa 52, Ishimwe Djabil yateye ishoti rikomeye rikubita igiti cy’izamu.

Umukino warangiye APR FC itsinze 2-1, yegukana amanota atatu y’ingenzi. Iyi ntsinzi yahise iyifasha kuzamuka ku mwanya wa kabiri n’amanota 18, irushwa ane na Police FC ya mbere. APR FC iracyafite umukino umwe w’ikirarane kuko imaze gukina icyenda kuri 10 ya Police FC.

Ku rundi ruhande, Etincelles FC yo yabaye ku mwanya wa 15 n’amanota arindwi. Nta ntsinzi n’imwe irabona mu mikino icyenda, kuko yanganyije irindwi itsindwa ebyiri, bikomeza kugaragaza ko ikomeje kugorwa muri uyu mwaka w’imikino.

KWAMAMAZA: Niba utarafunguza konti muri Fortebet kandi ukaba wifuza gutega ku mukino itandukanye utavuye aho uri kandi ku bikubo utasanga ahandi mu Rwanda gana Fortebet; kwiyandikisha kanda hano winjire mu muryango mugari utagira uwo uheza hanyuma uhabwe ikaze ry’amafaranga 200 frw yo gukoresha ipari ya mbere, Kanda munsi 👇👇👇https://www.fortebet.rw/?pref_device=desktop&utm_source=thedrum_rw&utm_medium=leaderboardHP&utm_c