Umutoza wa APR FC yashinje ingengabihe yegeranye kumutera umusaruro nkene

Ku mugoroba wo ku wa Gatanu, c yongeye gushidikanywaho n’abakunzi bayo nyuma yo kunganya na AS Kigali igitego 1–1, mu mukino w’Umunsi wa Cyenda wa Shampiyona waberaga kuri Kigali Pele Stadium.

Ibyafatwaga nk’ibisanzwe byatangiye kuba nk’urusobe rw’amezi agoye kuri iyi kipe y’ingabo z’igihugu.

Nyuma y’umukino, umutoza mukuru Abderrahim Talib ntiyazuyaje kugaragaza ko icyuho kiri hagati y’imyiteguro n’imikino myinshi kandi bigoye gukuraho amanota atatu.

 Talib yavuze ko imikino myinshi yegeranye iri gusiga abakinnyi be barangaye, bamwe bananiwe ndetse abandi bakigaruka mu mvune.

Yagize ati: “Ni umukino wari udukomereye cyane. Twari dufite iminsi ibiri gusa nyuma y’undi mukino ukomeye twari tumaze gukina, bityo imyiteguro iba mito cyane. Muri make twakinnye imikino itatu mu minsi itanu, kandi ibyo birushya cyane abakinnyi.”

INDI NKURU WASOMA BIFITANYE ISANO :RPL – APR FC yanganije na AS Kigali

Uyu mukino wabaye uwa kane APR FC itabasha kubona intsinzi mu minsi mike ishize, ndetse uba n’uwa gatatu inganya, ibintu bidakunze kugaragara kuri iyi kipe isanzwe izwiho kugira umuvuduko n’imbaraga mu mikino y’imbere mu gihugu.Abafana benshi bahise bibaza niba ikibazo gikomeye kitari mu rwambariro rwayo.

Talib yakomeje asobanura ko hari abakinnyi bagarutse mu kibuga batarakira neza, ibintu byongeye kurushya uburyo bwo kubategura mu mikino ikurikiranye.

Ati : “Biragora cyane cyane nka bariya twari dufite abenshi bavunitse. Twifuzaga gutsinda byibuze ibitego byinshi, ariko ni uko twari tumeze, ntabwo byoroshye. Turaza kubikosora nubwo mu minsi ibiri gusa dufite undi mukino ukomeye; uko biri kose ntabwo byoroshye.”

Magingo aya APR FC ifite impamba y’amanota 15, ayishyira ku mwanya wa kabiri ku rutonde rw’agateganyo rwa Shampiyona.

Iyi kipe y’Ingabo z’Igihugu irateganya kwisubiraho mu mukino w’ikirarane izahuramo na Etincelles FC ku wa Kabiri, tariki ya 2 Ukuboza 2025.