Mukura VS  yasobanuje iby’ihitwamo ry’amakipe azakina Igikombe cy’Intwari

Ikipe ya Mukura Victory Sports et Loisirs yandikiye Ishyirahamwe ry’Umupira w’Amaguru mu Rwanda (FERWAFA) isaba ibisobanuro ku buryo amakipe azakina Igikombe cy’Intwari cya 2026 yatoranyijwe, nyuma yo gusanga amategeko asanzwe agenderwaho atubahirijwe.

Mukura yabaye ikipe ya kabiri isabye ibisobanuro kuri iki cyemezo, nyuma ya Kiyovu Sports na yo yari yagaragaje kutanyurwa n’uburyo byagenze.

Ku wa 12 Mutarama 2026, FERWAFA yamenyesheje amakipe atandatu ko ari yo azitabira iri rushanwa, arimo ane yo mu bagabo n’abiri yo mu bagore.

Mu bagabo, hatoranyijwe Rayon Sports, APR FC, AS Kigali na Police FC hashingiwe ku myanya iyi makipe yarangijeho muri Shampiyona ya 2024/25, mu gihe mu bagore hatoranyijwe Rayon Sports WFC na Indahangarwa WFC.

Icyakora, ubusanzwe iri rushanwa rikinwa n’amakipe ane ya mbere ku rutonde rwa shampiyona iri gukinwa muri uwo mwaka w’imikino.

Mukura VS ivuga ko iyo hakurikizwa uko urutonde ruhagaze muri shampiyona ya 2025/26, yagombaga kubona itike yo gukina iri rushanwa. Kugeza ubu, Police FC ifite amanota 34, APR FC ifite 32, Kiyovu Sports ifite 27, mu gihe Mukura VS ifite amanota 26, bigatuma iza mu makipe ane ya mbere.

INDI NKURU WASOMA:Manchester United yiyongereye amahirwe yo gusinyisha Carlos Baleba

Mu gusobanura iki cyemezo, Umunyamabanga Mukuru wa FERWAFA, Bonnie Mugabe, yavuze ko bahisemo gushingira ku mwaka w’imikino wa 2024/25 kubera ko imikino ibanza ya shampiyona ya 2025/26 itararangira ku makipe yose.

Yagize ati: “Intego yari ukugira ngo imyiteguro y’iri rushanwa itangire kare, twirinda ibintu bikorwa ku munota wa nyuma.” nkuko yabibwiye Igihe.

Igikombe cy’Intwari cya 2026 giteganyijwe gutangira ku wa 28 Mutarama hakinwa imikino ya kimwe cya kabiri, naho umukino wa nyuma ukazakinwa ku wa 1 Gashyantare, umunsi wizihirizwaho Umunsi w’Intwari.