Volleyball- FRVB yatangaje batanu bagomba kuvamo utoza ikipe y’igihugu

Nyuma y’isozwa ry’amasezerano y’umutoza w’Umunyaburezili Paul de Tarso, Ishyirahamwe ry’Umukino wa Volleyball mu Rwanda (FRVB) ryemeje ko abatoza batanu bamaze gutoranywa mu bazavamo uzahabwa inshingano zo gutoza amakipe y’igihugu ya Volleyball y’abagabo n’abagore.

Aba batoza bazakora ibizamini by’imvugo (interviews) ku itariki ya 21 Mutarama, aho umwe muri bo ari we uzatoranywa.

Uzatsinda azahita ahura n’inshingano zikomeye zirimo gutegura Ikipe y’Igihugu y’Abagabo izitabira Igikombe cya Afurika cya Volleyball kizakinwa mu 2026. Ubushize u Rwanda rwitabiriye iri rushanwa ni mu 2023, aho rwasoje ku mwanya wa gatandatu.

Mu mazina atanu yatangajwe, umutoza w’Umunyakenya Sammy Mulinge ni we wenyine umaze igihe akorera mu Rwanda. Mulinge amaze imyaka irenga 12 atoza APR Volleyball Club, akaba ari nayo kipe ifite igikombe cya shampiyona giheruka.

Muri icyo gihe yayifashije kwegukana ibikombe birindwi bya shampiyona, ndetse ayigeza ku mwanya wa gatandatu mu marushanwa nyafurika ya za club mu 2014. Yanatoje amakipe y’igihugu ya Beach Volleyball mu 2019.

INDI NKURU WASOMA:Moise Ntirenganya yasinyiye ikipe yo muri Kenya

Undi uri ku rutonde ni Umudage Peter Nonnebroich, watoje Cameroun mu gikombe cy’isi cya Volleyball mu 2014, anagira uruhare mu iterambere ry’abato bato muri Kenya. Afite ubunararibonye bukomeye mu makipe yo ku mugabane w’i Burayi n’Afurika.

Umufaransa Frédéric Guérin na we ari mu bahatanira izi nshingano. Azwiho gutegura amakipe mu buryo burambye no kubaka abakinnyi b’ejo hazaza, akaba yaratoje amakipe atandukanye mu Bufaransa.

Jean-René Akono wo muri Cameroun afite amateka akomeye, cyane cyane mu ikipe y’abagore, yayihesheje ibikombe bitatu bya Afurika. Yanafashije Cameroun kwitabira igikombe cy’isi.

Hari kandi Umunya-Tunisia Ghazi Kaabi, wahoze ari umukinnyi mpuzamahanga wanitabiriye imikino Olempike mu 1996. Yatoje Libya ayigeza ku mwanya wa gatatu muri Afurika mu 2023.