Manchester United yiyongereye amahirwe yo gusinyisha Carlos Baleba

Ikipe ya Manchester United iragenda irushaho kugira icyizere cyo kuzabona umukinnyi wo hagati wa Brighton & Hove Albion, Carlos Baleba, mu isoko ry’igura n’igurisha ryo mu mpeshyi iri imbere.

Amakuru aturuka hafi y’iyi kipe yo ku kibuga Old Trafford agaragaza ko abayobozi bayo bari gutegura impinduka zikomeye mu kibuga hagati, bijyanye no kongera kubaka ikipe no gushaka umutoza mukuru uhoraho uzatangira akazi nyuma y’uyu mwaka w’imikino.

Kuri ubu, Manchester United ntiyitezweho kugura abakinnyi benshi mu isoko ryo muri Mutarama, cyane ko iri gutozwa by’agateganyo na Michael Carrick, uzasoza imikino 17 isigaye ya shampiyona.

Ibi si bishya kuri United, kuko no mu bihe byashize, ubwo Ole Gunnar Solskjaer na Ralf Rangnick bayitozaga by’igihe gito, iyi kipe yitwararitse kugura abakinnyi mu mezi y’itumba.

Carlos Baleba, ufite imyaka 22, afite amasezerano na Brighton azageza mu 2028. Nubwo Brighton yanze ibiganiro by’ibanze byatanzwe na United umwaka ushize, amakuru avuga ko agaciro k’uyu mukinnyi katakiri hejuru cyane nk’uko byari byitezwe.

INDI NKURU WASOMA:APR FC irangamiye  gutsinda irusha Al Merrikh SC

Muri Kanama 2025, Baleba yabarirwaga hagati ya miliyoni 80 na 100 z’amapawundi, ariko United ntiyigeze itanga isoko rihamye kuko yari imaze gushora arenga miliyoni 200 ku bandi bakinnyi barimo Bryan Mbeumo, Matheus Cunha na Benjamin Sesko.

N’ubwo ari umukinnyi ufite impano idasanzwe, Baleba yakunze gusimbuzwa hakiri kare muri uyu mwaka w’imikino, aho inshuro zirindwi yasimbuwe hagati mu mukino, haba muri Brighton cyangwa mu ikipe y’igihugu ya Cameroun.

Ku rundi ruhande, Brighton izwiho politiki nziza yo gushaka impano no gusimbuza abagenda, nk’uko byagenze kuri Moises Caicedo na Alexis Mac Allister. Ibi bituma idafite igitutu cyo kugurisha Baleba ako kanya.

Manchester United kandi iri kureba n’abandi bakinnyi bo hagati barimo Elliot Anderson wa Nottingham Forest, Adam Wharton wa Crystal Palace na Alex Scott wa Bournemouth.