RPL -APR FC itsinze Amagaju ikomeza kurya Police FC isataburenge

Ikipe ya APR FC yakomeje kwerekana ko iri mu bihe byiza nyuma yo gutsinda Amagaju FC igitego 1-0 mu mukino w’umunsi wa 15 wa shampiyona wabereye kuri Stade.

Iki gitego cyatsinzwe na Omborenga Fitina cyafashije iyi kipe y’Ingabo guhita ifata umwanya wa kabiri n’amanota 32, irushwa abiri gusa na Police FC iyoboye urutonde.

Uyu mukino waje mu bihe bitandukanye ku makipe yombi. APR FC yari ikiva mu byishimo byo gutsinda Rayon Sports ibitego 4-1 ikanegukana igikombe cya Super Cup, mu gihe Amagaju yo yari akubutse mu gihombo gikomeye cyo gutsindwa na Al Hilal ibitego 8-0.

Byongeye kandi, uyu wari umukino usoza imikino ibanza ya Amagaju, kuko yo yakinaga umunsi wa 17.Umutoza wa APR FC, Taleb Abdelrahim, yakoze impinduka nyinshi mu bakinnyi babanjemo, agarura amazina akomeye nka Omborenga Fitina, Ruboneka Bosco, Mamadou Sy na Denis Omedi.

Icyakora, igice cya mbere cy’umukino ntago cyarimo uburyo bwinshi bufatika ku mpande zombi, uretse amashoti ya Sy na Fitina yagiye inyuma y’izamu, amakipe ajya kuruhuka ari ubusa ku busa.

INDI NKURU WASOMA BIFITANYE ISANO:APR FC yegukanye Super Cup ya 2025 inyagiye Rayon Sports

Mu gice cya kabiri, APR FC yagarutse ifite inyota yo kubona igitego. Ku munota wa 65, Omborenga Fitina yabyaje umusaruro uburangare bwa ba myugariro ba Amagaju atsinda igitego rukumbi cyabonetse muri uyu mukino.

Nyuma y’icyo gitego, Amagaju yakoze impinduka mu izamu, ariko umunyezamu mushya Jacques yagerageje kugumana ikipe ye mu mukino akuramo imipira ikomeye.

Nubwo APR FC yakomeje gusatira ishaka igitego cya kabiri, umukino warangiye ari 1-0. Iyi ntsinzi ishyize APR FC ku mwanya wa kabiri, igakomeza guhangana na Police FC mu rugamba rwo kuyobora shampiyona.