Abakinnyi bashya ba Rayon Sports bose biteguye guhura na APR FC – Bruno Ferry

Umutoza wa Rayon Sports, Bruno Ferry, yatangaje ko abakinnyi bose bashya iyi kipe yaguze mu isoko ry’igura n’igurisha ry’abakinnyi biteguye gukina umukino wa Super Cup uzayihuza na APR FC.

Ibi yabivugiye mu myitozo ya nyuma yabaye kuri uyu wa Gatanu tariki ya 9 Mutarama 2026, mbere y’umukino uteganyijwe kuba ejo ku wa Gatandatu tariki ya 10 Mutarama 2026 kuri Stade Amahoro i Remera.

Ni umukino utegerejwe cyane n’abakunzi b’amakipe yombi, cyane ko usanzwe uhuza amakipe ahora ahanganye mu mupira w’amaguru w’u Rwanda.

Mu kiganiro yahaye itangazamakuru, Bruno Ferry yabajijwe niba abakinnyi bashya batandatu Rayon Sports yaguze bemerewe kandi biteguye gukina uyu mukino ukomeye.

Uyu mutoza yasubije mu buryo budashidikanywaho, agaragaza icyizere afitiye abo bakinnyi.

Ati: “Yego, ndumva bose bahari kandi biteguye. Nta kibazo bafite, bakoze imyitozo neza kandi bari mu mwuka mwiza wo gukina.”

Abakinnyi bashya Rayon Sports yongereye mu ikipe ni Kwizera Olivier, Tshimanga Tshilemb, Yannick Bangala, Aziz Ben Dao, Likau Kitoko na Bienvenu Vigninou.

INDI NKURU WASOMA :Abafana ba Manchester United bagiye kwigaragambiriza akajagari mu ikipe

Aba bakinnyi bose bitezweho kongerera imbaraga ikipe, haba mu bwugarizi, mu kibuga hagati no mu busatirizi.

Uyu mukino wa Super Cup ugiye kuba ku nshuro ya gatatu Rayon Sports ihuye na APR FC muri iri rushanwa.

Ku nshuro ebyiri ziheruka, Rayon Sports ni yo yegukanye igikombe, aho mu 2017 yatsinze APR FC ibitego 2-0, naho mu 2023 iyitsinda ibitego 3-0. Aya mateka atuma abafana ba Gikundiro bongera kugira icyizere, nubwo APR FC na yo yiteguye kwihorera.