Cristiano Ronaldo ntazamanika urukweto atujuje ibitego 1000

Kapiteni w’ikipe y’igihugu ya Portugal, Cristiano Ronaldo, yatangaje ko atazahagarika gukina ruhago ataruzuza igitego cya 1,000 mu mwuga we.

Mu mpera z’icyumweru gishize, Ronaldo yatsinze ibitego bibiri mu mukino Al-Nassr yatsinzemo Al Akhdoud ibitego 3-0, bituma umubare w’ibitego amaze gutsinda mu makipe no mu gihugu ugira 956.

Ibi byongeye kugaragaza ko uyu rutahizamu ataracika intege, nubwo amaze imyaka myinshi akina ku rwego rwo hejuru.

Ronaldo yageze muri Al-Nassr yo muri Arabie Saoudite mu 2022, maze muri Nyakanga umwaka ushize asinya amasezerano mashya y’imyaka ibiri azasiga arengeje imyaka 42 y’amavuko.

Nyuma yo guhabwa igihembo cy’Umukinnyi mwiza wo mu Burasirazuba bwo Hagati mu birori bya Globe Soccer Awards byabereye i Dubai, yavuze ko n’ubwo gukomeza gukina bigoye, agifite inyota yo gukomeza.

Yagize ati: “Ndacyafite ishyaka rikomeye. Nishimira ruhago aho naba ndi hose, yaba mu Burayi cyangwa mu Burasirazuba bwo Hagati. Intego yanjye irazwi: gutsinda ibikombe no kugera ku bitego 1,000, kandi nzabigeraho niba nta mvune.”

INDI NKURU WASOMA :‘Turashaka kwegukana ibikombe bine uyu mwaka’ – William Saliba

Uyu mwaka w’imikino, Ronaldo amaze gutsinda ibitego 13 mu mikino 14 yakiniye Al-Nassr, ikipe iyoboye shampiyona ya Saudi Pro League irusha iyikurikiyeho amanota ane.

Nubwo amaze gutsinda ibitego 112 mu mikino 125 yakiniye Al-Nassr, iyi kipe imaze gutwara igikombe kimwe gusa cya Arab Club Champions Cup mu 2023.

Ronaldo ni we ufite agahigo ko gutsinda ibitego byinshi mu mateka ya Portugal (143) no muri Real Madrid (450), ndetse akaba ari we mukinnyi rukumbi watsinze ibitego birenga 100 mu makipe ane atandukanye: Manchester United, Real Madrid, Juventus na Al-Nassr.

Yatangaje kandi ko Igikombe cy’Isi cya 2026 kizabera muri Leta Zunze Ubumwe za Amerika, Canada na Mexique kizaba ari cyo cya nyuma azakinamo mu ikipe y’igihugu.