Pep Guardiola yategetse abakinnyi ba Man City kujya kwipimisha ibilo

Umutoza wa Manchester City, Pep Guardiola, yatangaje ko abakinnyi be bazongera gupimwa ibiro ubwo bazaba basubiye mu myitozo nyuma y’ikiruhuko gito cya Noheli, hagamijwe kureba niba bafite imbaraga n’ubuzima bihagije mbere yo gukina na Nottingham Forest ku itariki ya 27 Ukuboza.

Ibi Guardiola yabivuze nyuma y’uko Manchester City itsinze West Ham ibitego 3-0 mu mukino wabaye ku wa Gatandatu, ari na wo wari umukino wa nyuma w’iyi kipe mbere ya Noheli.

Uyu mutoza w’imyaka 54 yavuze ko abakinnyi be bari bapimwe mbere y’uwo mukino kandi bakerekana ibisabwa, ariko ko bazongera gupimwa bagarutse mu myitozo mu cyumweru gitaha.

Guardiola uzwiho gukurikirana cyane imyitwarire n’ubuzima bw’abakinnyi, yavuze ko n’ubwo bemerewe kurya no kwishimisha mu minsi y’ikiruhuko, agomba kugenzura uko bazagaruka bameze.

Yagize ati: “Niba umukinnyi agarutse yiyongereyeho ibilo birenze bitari, ntabwo azajya i Nottingham. Azasigara i Manchester.”

Si ubwa mbere Guardiola afashe icyemezo gikakaye ku bijyanye n’ibiro by’abakinnyi. Mu 2016, hari abakinnyi yigeze gukura mu myitozo y’ikipe ya mbere kugeza bujuje ibisabwa.

INDI NKURU WASOMA :Nyuma y’umutoza ;Rayon Sports igiye kumanura umwataka

Uwahoze akinira City ku ruhande rw’inyuma, Gael Clichy, yigeze gutangaza ko Guardiola yabujije abakinnyi be kurya pizza, kunywa imitobe imwe n’imwe no kurya amafunguro aremereye.

Nubwo atigeze ahakana ko hari ibyo kunoza mu mikinire, Guardiola yavuze ko ikibazo atari imbaraga cyangwa kwiruka kw’abakinnyi, ahubwo ari uko bagomba gukina neza kurushaho. Yongeyeho ko yanze gusaba ikiruhuko cy’imyitozo ku Cyumweru kuko atanyuzwe n’imikinire yabo.

Manchester City ubu iri inyuma ya Arsenal n’amanota abiri gusa ku rutonde rwa shampiyona. Nyuma yo gukina na Nottingham Forest, izahita ijya gukina na Sunderland ku munsi wa mbere w’umwaka mushya.