Nyuma y’umutoza ;Rayon Sports igiye kumanura umwataka

Mu rugendo rwo kongera kubaka ikipe ikomeye ishobora guhatanira ibikombe, Rayon Sports ikomeje kwitwara neza ku isoko ry’abakinnyi n’abatoza, aho hitezwe rutahizamu mushya ukomoka muri Cameroun, Kooh Bioumla Jules Armand.

Amakuru dukesha ikinyamakuru Isimbi yemeza ko, mu gihe nta gihindutse, uyu mukinnyi azagera mu Rwanda kuri uyu wa Mbere tariki ya 22 Ukuboza 2025.

Kooh Bioumla ni rutahizamu umaze igihe adakina, nyuma yo gutandukana na Club Africain yo muri Tunisia, aho yari yaragiye akinira mu mwaka w’imikino wa 2024–2025.

Muri iyi kipe yakinnye imikino 14, atsinda ibitego bibiri gusa, mbere yo gusesa amasezerano. Mbere yaho, hagati ya 2019 na 2024, yari yarigaragaje mu ikipe ya Astres de Douala yo mu gihugu cye, Cameroun.

Nubwo amaze amezi agera kuri atandatu nta kipe afite, Kooh ni umwe mu bakinnyi bahamagawe mu ikipe y’Igihugu ya Cameroun mu 2024, bigaragaza ko afite ubushobozi bushobora kunganira Rayon Sports.

Uyu rutahizamu ategerejweho gufasha ubusatirizi bw’iyi kipe, bumaze iminsi buhungabanywa n’imvune z’abakinnyi b’ingenzi. Ubuyobozi bwa Rayon Sports burizera ko azazana imbaraga nshya mu mikino isigaye ya shampiyona n’andi marushanwa.

INDI NKURU WASOMA :Twamenye igihe imirimo yo kuvugurura Stade ya Huye izagerera ku musozo!

Ku rundi ruhande, Rayon Sports iherutse gutangaza ku mugaragaro umutoza mushya, Bruno Ferry, ku Cyumweru tariki ya 21 Ukuboza 2025.

Uyu mutoza w’Umufaransa yageze mu Rwanda ku wa Gatanu tariki ya 19 Ukuboza 2025, aho yaje gushyira umukono ku masezerano y’amezi atandatu, ndetse anareba umukino Rayon Sports yatsinzemo Gorilla FC ibitego 2-1.

Mu byo Bruno Ferry yiyemeje harimo guhesha Rayon Sports igikombe nibura kimwe mu marushanwa abiri akomeye akinirirwa mu Rwanda.

Akigera ku kibuga cy’indege cya Kanombe, yatangaje ko yishimiye amahirwe yo gutoza iyi kipe, avuga ko intego ye ari ugukorana amateka na Rayon Sports.

Bruno Ferry, ufite imyaka 58, yanyuze mu makipe atandukanye muri Afurika arimo Azam FC yo muri Tanzania, Accra Lions yo muri Ghana na AS Vita Club yo muri RDC. Nubwo adakunze kumara igihe kinini aho anyuze, abafana ba Rayon Sports barizera ko ubunararibonye bwe buzagira uruhare mu kuzahura iyi kipe.