Amavubi yongeye guhananuka ku rutonde rwa FIFA

Ikipe y’Igihugu y’u Rwanda, Amavubi, yasoje umwaka wa 2025 iri ku mwanya wa 131 ku rutonde ngarukakwezi rw’Ishyirahamwe ry’Umupira w’Amaguru ku Isi (FIFA).

Uru rutonde rwasohotse kuri uyu wa Mbere, tariki ya 22 Ukuboza 2025, rugaragaza uko amakipe atandukanye yitwaye hashingiwe ku mikino yakinnye n’amanota yayivuyemo.

Mu kwezi k’Ukuboza, u Rwanda ntirwakinnye umukino n’umwe mpuzamahanga. Nta mukino wa gicuti cyangwa uwo mu marushanwa rwitabiriye, ndetse n’umwiherero wa nyuma wakozwe wari uw’abakinnyi bakina imbere mu gihugu, bakinnye hagati yabo gusa.

Ibi byatumye u Rwanda rubura amanota, rukomeza kugumana 1117,78 rwari rufite kuva mu kwezi k’Ukwakira.

Kuguma kuri ayo manota byatumye Amavubi akomeza kuguma ku mwanya wa 131 ku Isi, umwanya yari yagezeho mu Ukwakira 2025, ubwo yari yamanuweho imyanya ine.

INDI NKURU WASOMA BIFITANYE ISANO:AFCON2025 – Imyato ikomeje kwivugwa mbere yuko South Africa na Angola bacakirana

Nubwo nta mpinduka zabaye mu kwezi gusoza umwaka, uru rutonde rukomeza kugaragaza urugendo rutoroshye Ikipe y’Igihugu iri mo, cyane cyane mu gihe ishaka kongera kuzamura urwego rwayo ku ruhando mpuzamahanga.

Mu karere u Rwanda ruherereyemo, Uganda ni yo iyoboye urutonde, iri ku mwanya wa 85 ku Isi, umwanya yagumyeho kuva mu kwezi gushize. Tanzania iri ku mwanya wa 112, ikurikirwa na Kenya ya 113, mu gihe u Burundi buri ku mwanya wa 145. Ibi bigaragaza ko u Rwanda rugifite urugendo rurerure rwo kugabanya ikinyuranyo hagati yarwo n’ibihugu bimwe byo mu karere.

Ku rwego rw’Isi hose, Espagne ikomeje kuyobora urutonde, ikurikiwe na Argentine, u Bufaransa n’u Bwongereza, mu gihe Brésil iri ku mwanya wa gatanu.