AC Milan irangamiye  Niclas Füllkrug wa Westham

Ikipe ya AC Milan iri hafi kurangiza amasezerano yo kuguriza rutahizamu wa West Ham United, Niclas Füllkrug, mu gihe cy’amezi atandatu ya mbere, mu rwego rwo kongerera imbaraga ubusatirizi bwa yo mu gice cya kabiri cy’uyu mwaka w’imikino.

West Ham yiteguye kureka uyu mukinnyi mpuzamahanga w’Ubudage akava i London Stadium muri Mutarama, cyane ko amahirwe yo gukina mu ikipe ya mbere yagabanutse kuva Nuno Espírito Santo yagera ku ntebe y’ubutoza.

Ibi byatumye Füllkrug atabona umwanya uhagije wo kwerekana ubushobozi bwe muri Premier League.

Amakipe yombi ari mu biganiro bigeze kure, aho biteganyijwe ko uyu rutahizamu w’imyaka 32 yerekeza mu Butaliyani akazakinira AC Milan kugeza umwaka w’imikino urangiye.

Amakuru ava hafi y’ibi biganiro avuga ko ayo masezerano ashobora no kuzamo amahitamo yo kumuguna burundu, mu gihe Milan yaba inyuzwe n’umusaruro we.

Füllkrug amaze kugaragara mu mikino icyenda gusa ya West Ham muri uyu mwaka w’imikino, ibintu byagaragaje ko atari mu bakinnyi b’ingenzi bashingirwaho.

Muri rusange, amaze gutsinda ibitego bitatu mu mikino 28 amaze gukinira iyi kipe yo mu mujyi wa Londres.

INDI NKURU WASOMA:AFCON2025 : Zambia iguye miswi na Mali

Uyu mukinnyi wahoze akinira Borussia Dortmund yageze muri West Ham muri Kanama 2024, agurwa amafaranga angana na miliyoni 19 z’amapawundi.

Icyakora, umwaka we wa mbere muri iyi kipe waranzwe n’imvune zamubangamiye, bituma adakina imikino myinshi nk’uko byari biteganyijwe.

Naramuka ageze muri AC Milan, Füllkrug azaba afite amahirwe yo kongera kubona umwanya wo gukina, ndetse agafasha iyi kipe yo mu Butaliyani mu guhatanira imyanya myiza mu marushanwa yo mu gihugu no ku mugabane w’u Burayi.