Umunya-Misiri warimo kugeragezwa muri Rayon Sports yasezerewe by’ikubagaho

Ikipe ya Rayon Sports ikomeje imyiteguro y’umukino w’umunsi wa 12 wa shampiyona y’icyiciro cya mbere mu Rwanda ya 2025/2026, aho izakira Gorilla FC ku wa Gatanu saa Kumi n’ebyiri n’iminota 30 kuri Kigali Pele Stadium.

Ni mu gihe kandi iyi kipe ikomeje gusuzuma abakinnyi bashya ishobora kongeramo imbaraga mbere y’uko isoko ry’igura n’igurisha rifungura.

Ku wa Kabiri tariki ya 16 Ukuboza 2025, Rayon Sports yakoze imyitozo ibiri, mu gitondo na nimugoroba.

Imyitozo ya nimugoroba ni yo yagaragayemo abakinnyi babiri bashya bari baje kugeragezwa. Muri bo harimo Muhammad Ssenoga Kagawa wakiniraga Express FC yo muri Uganda, uri mu biganiro byo gusinyira Gikundiro.

Uyu musore w’imyaka 24 ari mu bihe byiza, kuko kugeza ubu ari we uyoboye abamaze gutsinda ibitego byinshi muri shampiyona ya Uganda, aho afite ibitego bitandatu mu mikino 10.

Undi mukinnyi wagaragaye ni Ally Ismael ukomoka mu Misiri, wakinaga muri shampiyona ya Azerbaijan.

Uyu yari yaje gukora igerageza muri Rayon Sports, icyakora ntiryamuhiriye. Nyuma yo gukora imyitozo inshuro imwe gusa, yahise asezererwa n’abatoza nyuma yo gusanga urwego rwe rutajyanye n’ibikenewe n’iyi kipe. Ibi byanatumye amafoto ye yari yashyizwe ku mbuga nkoranyambaga za Rayon Sports ahita asibwa.

INDI NKURU WASOMA:Thierry Henry yahawe igihembo cy’icyubahiro na BBC

Amakuru kandi avuga ko Ally Ismael yari yaranakoze igerageza muri Kiyovu Sports, ariko na ho agasanga urwego rwe ruri hasi ku buryo atabona amahirwe yo kuguma muri iyo kipe.

Rayon Sports ikomeje gushakisha abakinnyi izongeramo imbaraga mu bwugarizi, hagati no mu busatirizi, mu gihe isoko rizafungura tariki ya 3 Mutarama 2026.

Perezida wayo, Murenzi Abdallah, aheruka gutangaza ko hateganyijwe kongeramo abakinnyi batanu, barimo babiri b’Abanyarwanda n’abandi batatu b’Abanyamahanga, mu rwego rwo gukomeza guhatanira ibikombe.