Ousmane Dembélé yegukanye igihembo cy’umukinnyi w’umwaka wa FIFA

Mu muhango wabereye i Doha muri Qatar, rutahizamu wa Paris Saint-Germain n’ikipe y’igihugu y’u Bufaransa, Ousmane Dembélé, yegukanye igihembo cy’umukinnyi w’umwaka mu bagabo mu bihembo bya ‘FIFA The Best’.

 Ni igihembo cy’icyubahiro gikomeye kigaragaza umusaruro udasanzwe yagize mu mwaka w’imikino wa 2024–2025.

Uyu mukinnyi w’imyaka 28, wari umaze kwegukana Ballon d’Or muri Nzeri, yahembwe nyuma yo gufasha PSG gutwara ibikombe bine mu mwaka ushize.

Dembélé, wavuye muri FC Barcelona na Borussia Dortmund akerekeza muri PSG mu 2023, yagize uruhare mu bitego 51 mu mikino 53 yakiniye ikipe ya Luis Enrique.

Nyuma yo gufasha PSG gutwara Champions League ku nshuro ya mbere mu mateka yayo, Dembélé yatsinze Lamine Yamal wa Barcelona na Kylian Mbappé wa Real Madrid mu marushanwa yo guhatanira iki gihembo.

INDI NKURU WASOMA:PSG yategetswe kwishyura Kylian Mbappé miliyoni 60

Yari ahari mu muhango wo guhembwa n’ubwo PSG yari yitegura gukina umukino wa nyuma w’Igikombe Mpuzamigabane na Flamengo.

Iki gihembo gitangwa hashingiwe ku byagezweho kuva muri Kanama 2024 kugeza muri Kanama 2025, kikagenderwaho amajwi y’abatoza b’amakipe y’ibihugu, ba kapiteni, abanyamakuru n’abafana. Intsinzi ya Dembélé yemeza ko ari umwe mu bakinnyi beza ku Isi muri iki gihe.

N’ubwo yatangiye umwaka atari ku rwego rwo hejuru, Dembélé yongeye kwigaragaza cyane ubwo yimurwaga akina hagati mu busatirizi. Muri Champions League yatsinzemo ibitego umunani mu bitego 35 PSG yinjije muri rusange, harimo n’iby’ingenzi yatsinze Liverpool na Arsenal mu mikino yo gukuranwamo.

Ku rwego mpuzamahanga, yafashije u Bufaransa kubona itike y’Igikombe cy’Isi gitaha, aho buzahura na Sénégal, Norvège n’ikipe izava mu mikino yo gushaka itike.

Mu bakinnyi bagize “Team of the Year”, PSG yiharije imyanya myinshi, mu gihe Virgil van Dijk wa Liverpool na Cole Palmer wa Chelsea ari bo bonyine baturutse muri Premier League.