FIFA yahembye Donald Trump

Mu muhango  wabereye mu Mujyi wa Washington, Perezida wa Leta Zunze Ubumwe za Amerika, Donald Trump, yashyikirijwe igihembo cy’Amahoro gitangwa n’Ishyirahamwe ry’Umupira w’Amaguru ku Isi (FIFA), mu rwego rwo kumushima uruhare rwe mu bikorwa bitandukanye byo guteza imbere amahoro n’ubufatanye mpuzamahanga.

Uyu muhango wabereye mu rwego rwo gutangiza tombola y’amatsinda y’Igikombe cy’Isi cya 2026, igikorwa cyitabiriwe n’abayobozi b’inzego zinyuranye barimo na Gianni Infantino, Perezida wa FIFA, hamwe n’abahagarariye impuzamashyirahamwe y’umupira w’amaguru baturutse hirya no hino ku Isi.

Mu ijambo rye, Infantino yavuze ko iki gihembo kigamije gushimira no gukomeza gutera ingabo mu bitugu abantu n’abayobozi bakoresha imbaraga zabo mu guhuriza hamwe amahanga, bagaharanira kubaka ejo hazaza haganisha ku mahoro arambye.

 Nyuma yo gushyikiriza Perezida Trump iki gihembo, Infantino yagize ati: “Ni ibi twifuza ku Muyobozi. Gushyigikira amahoro ni umurongo tugomba guharanira twese.”

Nubwo iki gihembo kitandukanye n’ikizwi nka Prix Nobel gikorwa n’Itsinda ryihariye rishinzwe guhitamo abaharanira amahoro ku Isi, FIFA ivuga ko cyashyiriweho gushimira ibikorwa bifatika bigaragaza ubushake bwo guhuza imbaraga z’abatuye Isi, cyane cyane binyuze mu mikino ifatwa nk’ururimi rusumba izindi mu kunga abantu.

INDI NKURU WASOMA:Ni bande bafite amahirwe menshi yo kwegukana igikombe cy’isi cya 2026?

Mu Ugushyingo 2025, ni bwo FIFA yatangaje ko igiye gutangira gutanga iki gihembo buri mwaka, hagamijwe guha agaciro abaharanira iterambere ridateza ubushyamirane, kandi bagaharanira ko umupira w’amaguru uba urubuga rw’amahoro n’ubufatanye.

Ku ikubitiro, Trump ni we wahiswemo nk’uwabaye indashyikirwa mu kwerekana ubushake bwihariye mu bikorwa byo guteza imbere amahoro mu bihe bitandukanye, ibintu byarushijeho kwigaragaza mu mpera z’uyu mwaka.

Perezida Trump, wafashe ijambo nyuma yo guhabwa iki gihembo, yashimiye FIFA ku bw’iki gikorwa, avuga ko amahoro ari yo nkingi y’iterambere ry’ibihugu byose ndetse ko imikino ikwiye gukomeza kuba inzira yo guhuza Isi, ntabwo ari iyicamo ibice.

KWAMAMAZA: Niba utarafunguza konti muri Fortebet kandi ukaba wifuza gutega ku mukino itandukanye utavuye aho uri kandi ku bikubo utasanga ahandi mu Rwanda gana Fortebet; kwiyandikisha kanda hano winjire mu muryango mugari utagira uwo uheza hanyuma uhabwe ikaze ry’amafaranga 200 frw yo gukoresha ipari ya mbere, Kanda munsi👇👇👇
https://www.fortebet.rw/?pref_device=desktop&utm_source=thedrum_rw&utm_medium=leaderboardHP&utm_-c