Habimana Sosthène yasabye imbabazi nyuma y’umusaruro nkene yagize

Umutoza w’Ikipe y’Igihugu y’Abatarengeje Imyaka 17, Habimana Sosthène, yasabye imbabazi Abanyarwanda nyuma y’uko ingimbi z’u Rwanda zitashye amara masa mu irushanwa rya CECAFA U17 ryabereye muri Éthiopie, aho zasoreje ku mwanya wa nyuma nta mukino n’umwe zitsinze.

Ku wa Gatatu, tariki ya 26 Ugushyingo 2025, ni bwo aba bana barangije urugendo rwabo batsinzwe na Sudani y’Epfo ibitego 2-1, mu mukino wasozaga icyiciro cy’amatsinda. Nyuma yo gusoza irushanwa nta ntsinzi n’imwe, Habimana Sosthène yemeye ko umusaruro bagaragarije utari uhwanye n’icyizere Abanyarwanda bari babafitiye.

Yagize ati: “Abanyarwanda ntabwo bishimye. Na twe ntitwishimye. Ntekereza ko ari twe tubabaye cyane mbere y’uko bo bababara. Turasaba imbabazi kuko umusaruro twashakaga tutawubonye. Ntekereza ko amasomo twize ari menshi kandi ari ingirakamaro mu gihe kizaza.”

Umutoza yakomeje avuga ko nubwo ikipe yatsinzwe imikino yose uko ari ine, hari byinshi abakinnyi yungutse mu bijyanye n’ubunararibonye, cyane ko hashize igihe u Rwanda rutitabira amarushanwa akomeye nk’aya.

Yongeyeho ati: “Twashakaga amanota atatu kuri buri mukino ariko nta bwo twayabonye. Ariko icyiza ni uko abasore bungutse ubunararibonye. Ni byiza kuri bo, ni byiza ku Gihugu. Twabonye intege nkeya zacu, ubu tugomba gusubira mu rugo tukabikoraho.”

INDI NKURU WASOMA:Basketball :Dore icyo bisaba ngo u Rwanda rwitegura Guinea rujye mu gikombe cy’isi

Muri rusange, u Rwanda rwasoje irushanwa rutsinzwe ibitego icyenda , runinjiza bibiri  gusa. Byatumye rugaruka mu gihugu rufite umwenda w’ibitego birindwi, ibintu bitari byitezwe na benshi. Mbere yo gutsindwa na Sudani y’Epfo, Amavubi U17 yari yatsinzwe na Éthiopie 2-0, Kenya 2-1 ndetse na Somalia 3-0.

Nubwo icyizere cy’Abanyarwanda cyashegeshwe n’uyu musaruro, umutoza Habimana yemeza ko iri rushanwa ribahaye inzira nshya yo kureba aho bagomba gukosora kugira ngo u Rwanda ruzasubire guhatana ku rwego rwo hejuru mu marushanwa ari imbere.

Biteganyijwe ko itsinda ry’abakinnyi n’abatoza bari kumwe na bo, rigera mu Rwanda kuri uyu wa Kane Saa Kumi n’Imwe  n’igice z’amanywa.

KWAMAMAZA: Niba utarafunguza konti muri Fortebet kandi ukaba wifuza gutega ku mukino itandukanye utavuye aho uri kandi ku bikubo utasanga ahandi mu Rwanda gana Fortebet; kwiyandikisha kanda hano winjire mu muryango mugari utagira uwo uheza hanyuma uhabwe ikaze ry’amafaranga 200 frw yo gukoresha ipari ya mbere, Kanda munsi 👇👇👇
https://www.fortebet.rw/?pref_device=desktop&utm_source=thedrum_rw&utm_medium=leaderboardHP&utm_c