Muvunyi ashobora kuvanamo ake karenge –  Ubuyobozi bwa Murera burahura na RGB

Urwego rw’Igihugu rw’Imiyoborere (RGB) rwatumijeho ubuyobozi bwa Rayon Sports nyuma y’uko ibibazo by’imiyoborere n’amakimbirane bimaze igihe muri iyi kipe bikomeje gufata indi ntera .

Aya makimbirane yateye urujijo mu buyobozi, ndetse binagira ingaruka no ku musaruro w’ikipe mu kibuga.Abatumijwe ni Komite Nyobozi ya Rayon Sports iyobowe na Twagirayezu Thaddee ndetse n’Inama y’Ubutegetsi iyobowe na Paul Muvunyi.

Impamvu yo kubahamagara ngo ni ukuganira ku bibazo bimaze iminsi bivugwa hagati y’izi nzego, aho buri ruhande rukaba rwumva rufite ububasha bwo gufata ibyemezo, ibintu byakomeje guteza ukutumvikana no kugongana kw’inzego.

Ibi bibazo byageze aho bisakara mu ruhame, bamwe mu bayobozi batangira kuvugana amagambo akakaye. Martin Rutagambwa, ukuriye Akanama Nkemurampaka, aherutse gutangaza ko ikipe “iyobowe n’agatsiko k’amabandi n’ibisambo,” amagambo yaciyemo ibice abafana n’abakunzi ba Rayon Sports.

Ku rundi ruhande, Twagirayezu Thaddee we yavuze ko bishyamiranye kubera ko yanze kuba “igikoresho,” ibyo bikaba byafashe isura y’ikibazo mu buyobozi.

Mu bakinnyi naho ntibyabaye shyashya, kuko hari amakuru y’uko bamwe bashinjwa gukorera uruhande runaka. Ibi byose byatumye ikipe isa n’icikamo ibice bibiri, bikaba bikomeje kwangiza imikorere n’imigendekere myiza ya Rayon Sports.

RGB isanzwe yarahaye iyi kipe inama yo kuvugurura imiyoborere, harimo gushyiraho amategeko asobanutse ndetse n’urwego rumwe rufata ibyemezo yaba ari Inama y’Ubutegetsi cyangwa Komite Nyobozi kugira ngo hirindwe uguterana amagambo n’imivugire itajyanye.

INDI NKURU WASOMA :UCL – Byose ukeneye kumenya mbere yuko Chelsea na Barcelona zihura

Uyu mugoroba, ubwo iyi nama iteganyijwe kuba, biteganyijwe ko hanitabira Minisiteri ya Siporo, kuko na yo iherutse kwerekana ko ihangayikishijwe n’ibibera muri iyi kipe.

Iyi nama ibaye kandi nyuma y’uko tariki ya 19 Ugushyingo 2025, umuyobozi wa RGB, Dr Doris Uwicyeza Picard, agejeje imbere y’abadepite ko bari gukorana na Rayon Sports mu kuvugurura amategeko yayo kugira ngo ahuzwe n’igihe ndetse n’imiyoborere isabwa mu makipe akomeye.

Amakuru agera kuri The Drum avuga ko hari bamwe mu bayobozi b’iyi kipe biteguye kubwira RGB ko batagifite ubushake n’imbaraga byo gukomeza gukorera Rayon Sports, ndetse ngo bashaka “gukuramo akabo karenge” kugira ngo abandi babona ubushobozi bakomeze. Mu bo bivugwaho cyane harimo Paul Muvunyi, wagarukwaho kenshi mu makimbirane amaze iminsi avugwa.

Ibyitezwe muri iyi nama ni ukubanza kumenya inkomoko y’ibi bibazo byose, kumva impande zose no gushaka umuti urambye wo kwirinda ko iyi kipe y’ubukombe mu Rwanda ikomeza gutakaza icyerekezo.

KWAMAMAZA: Niba utarafunguza konti muri Fortebet kandi ukaba wifuza gutega ku mukino itandukanye utavuye aho uri kandi ku bikubo utasanga ahandi mu Rwanda gana Fortebet; kwiyandikisha kanda hano winjire mu muryango mugari utagira uwo uheza hanyuma uhabwe ikaze ry’amafaranga 200 frw yo gukoresha ipari ya mbere, Kanda munsi 👇👇👇

https://www.fortebet.rw/?pref_device=desktop&utm_source=thedrum_rw&utm_medium=leaderboardHP&utm_c