Bite by’ubuyobozi bushya bwa Rayon Sports bwagiyeho mu bwiru bukomeye?

Rayon Sports yongeye kugarura izina Abraham Kelly mu buyobozi bwayo, nyuma y’imyaka ibiri avuye muri iyi kipe ubwo yayoborwaga na Munyakazi Sadate.

Uyu wahoze ari Umunyamabanga Mukuru w’iyi kipe, hamwe na Habinshuti Mike, batangajwe nk’abafasha Perezida wa Rayon Sports, Twagirayezu Thaddée, mu nshingano z’imiyoborere, mu gihe hagitegerejwe ko Inteko Rusange yemeza abayobozi bashya.

Ibi byatangajwe na Twagirayezu ubwe ku wa Kane tariki 6 Ugushyingo 2025, ubwo iyi kipe yakoraga imyitozo yitegura umukino ukomeye w’ikirarane uzayihuza na APR FC kuri uyu wa Gatandatu tariki 8 Ugushyingo 2025 kuri Stade Amahoro.

Mu kiganiro yagiranye n’itangazamakuru, Twagirayezu yasobanuye ko aba bagabo bombi bari gufasha mu kuziba icyuho cyasizwe n’abayobozi beguye, barimo Ngoga Roger Aimable wari Visi Perezida wa Kabiri na Rukundo Patrick wari Umubitsi w’iyi kipe.

Yagize ati: “Hari abantu bamfasha cyane muri iyi minsi, cyane cyane mu miyoborere ya Rayon Sports. Habinshuti Mike na Abraham Kelly barimo kuziba icyuho cy’abatakiri mu nshingano. Inteko Rusange ni yo izafata icyemezo cya nyuma ku kuba bakomeza cyangwa se bagasimburwa.”

INDI NKURU WASOMA BIFITANYE ISANO : Umukino wa APR FC ukabirizwa mu bafana naho kuri nge urasanzwe: Umutoza wa Rayon Sports

Perezida wa Rayon Sports yanagize icyo avuga ku bibazo by’amategeko y’iyi kipe, ashimangira ko harimo gukorwa amavugurura azatuma Rayon Sports igira amategeko ajyanye n’amahame ya FERWAFA, CAF, FIFA ndetse na RGB.

Twagirayezu yakomeje abwira abanyamakuru  ati :“Tumaze guterana inshuro ebyiri twiga ku mategeko azayobora ikipe. Ndizera ko bitarenze amezi abiri tuzaba tuyafite ku buryo bwemewe n’amategeko. Tuzayereka abanyamuryango bose kugira ngo tuzajye mbere dufite umurongo usobanutse,”.

Ku bijyanye n’umukino w’ikirarane na APR FC, uyu muyobozi yagaragaje icyizere cyinshi cyo gutsinda, avuga ko ikipe ifite ikizere n’umwuka mwiza nyuma yo gutsinda imikino itatu yikurikiranya.

Yagize ati :“Umukino wa APR FC turawiteguye neza. Abakinnyi bafite akanyamuneza kandi dufite ikidusunika. Rayon Sports ntabwo ari ikipe yo gutsinda gusa, ahubwo ni umuryango wubakiye ku bufatanye. Turashaka gukomeza uyu murongo mwiza,”

Kugeza ubu, Rayon Sports iri ku mwanya wa kabiri ku rutonde rwa Shampiyona n’amanota 13, inyuma ya Police FC ifite amanota 16.

APR FC, bazahura ku wa Gatandatu, iri ku mwanya wa munani n’amanota umunani gusa, bikaba bituma uyu mukino witezweho byinshi mu bakunzi b’umupira w’amaguru mu Rwanda.

Uyu munsi w’imyitozo wabereye kuri Stade Nzove, wanitabiriwe n’abafana batandukanye barimo na Munyakazi Sadate wahoze ayobora iyi kipe, agaragara yegereye cyane ubuyobozi buriho, mu rwego rwo kugaragaza ubufatanye.

KWAMAMAZA: Niba utarafunguza konti muri Fortebet kandi ukaba wifuza gutega ku mukino itandukanye utavuye aho uri kandi ku bikubo utasanga ahandi mu Rwanda gana Fortebet; kwiyandikisha kanda hano winjire mu muryango mugari utagira uwo uheza hanyuma uhabwe ikaze ry’amafaranga 200 frw yo gukoresha ipari ya mbere, Kanda munsi 👇👇👇
https://www.fortebet.rw/?pref_device=desktop&utm_source=thedrum_rw&utm_medium=leaderboardHP&utm_