BREAKING _ Hatangajwe gahunda yose y’urugendo rw’Amavubi rugaruka I Kigali nyuma yo gutsinda Zimbabwe  

Uyu munsi ku wa Gatatu tariki ya 10 Nzeri 2025, ku isaha y’I  saa munani z’amanywa, Amavubi aratangira urugendo rugaruka mu Rwanda, aho ahagurukira kuri hoteli Red Radisson iri i Johannesburg muri Afurika y’Epfo.

Ku isaha ya saa kumi n’iminota 50 z’umugoroba, biteganyijwe ko indege ibatwaye ihaguruka ku kibuga cy’indege cya OR Tambo, bakagera i Kanombe saa mbiri n’igice z’ijoro (20h40).

Amakuru dukesha bamwe mu banyamakuru bari kumwe n’iyi kipe y’igihugu yemeza ko bakinnyi barimo Gitego Arthur, Mukudju Christian, Dylan, Mugisha Bonheur, Darryl Nkurikiyinka, Bryan Ngwabije, Mutsinzi Ange, Buhake Twizere,Abeddy Biramahire, Nshuti, Anicet Ishimwe, Kwizera Jojea,  Kavita Phanuel na Muhire Kevin  batari buzane n’ikipe ahubwo ko bahita basubira mu makipe yabo, gusa nubwo ingendo zabo zose ziteganyijwe uyu munsi ariko ziteganijwe gutangira mu masaha atandukanye.

Nyuma y’iminsi ibiri itoroshye y’imikino mpuzamahanga, Ikipe y’Igihugu y’u Rwanda “Amavubi” yasoreje urugendo rwayo muri Afurika y’Epfo isize inkuru nziza ku Banyarwanda. Nyuma yo gutsindwa na Nigeria igitego 1-0 ku wa 6 Nzeri 2025, Amavubi yagaragaje ishyaka n’ubwitange ejo ku wa Kabiri, ubwo yatsindaga Zimbabwe igitego 1-0.

INDI NKURU WASOMA BIFITANYE ISANO : REAL MADRID kuri myugariro wa Spurs & ahazaza ha Onana muri United – Ibyasohotse mu binyamakuru 

Ni umukino wagaragaje impinduka mu mikinire y’abakinnyi ndetse n’ubushake bwo gusubiza icyizere mu mitima y’Abanyarwanda. Iyi niyo ntsinzi ya mbere Amavubi abashije kubona kuva umutoza Adel Amrouche yatangira akazi muri Gashyantare uyu mwaka.

Kuri uyu mukino wa Zimbabwe, u Rwanda rwabanje mu kibuga abarimo Ntwari Fiacre, Kavita Phanuel, Niyomugabo Claude, Manzi Thierry, Mutsinzi Ange, Mugisha Bonheur, Bizimana Djihad (Kapiteni), Jojea Kwizera Hamon, Mugisha Gilbert na Abeddy Biramahire.

Ku ruhande rwa Zimbabwe, bakinishije: Washington Arubi, Emmanuel Jalai, Munashe Garananga, Gerald Takwara, Jordan Zemura, Marshal Munetsi, Prosper Padera, Knowledge Musona, Tawanda Maswanhise, Thandolwenkosi Ngwenya na Tawanda Chirewa.

Iyi ntsinzi ije nyuma y’igihe kinini u Rwanda rutabona intsinzi, dore ko iya nyuma yaherukaga kubonea ku wa 18 Ugushyingo 2024 ubwo rwatsindaga Benin ibitego 2-1 mu mikino yo gushaka itike y’igikombe cya Afurika cya 2023.

Imikino ya nyuma yo gushaka itike y’igikombe cy’Isi cya 2026 izakomeza mu Ukwakira. U Rwanda ruzakira Benin tariki ya 6 Ukwakira 2025, mbere yo kujya kwakirwa na Afurika y’Epfo tariki ya 10 Ukwakira.