Adel Amrouche yareze FERWAFA

Nyuma y’itangazo ryashyizwe ahagaragara n’Ishyirahamwe ry’Umupira w’Amaguru mu Rwanda (FERWAFA) rimenyesha ko ryatandukanye n’umutoza w’Ikipe y’Igihugu ‘Amavubi’, Adel Amrouche, uyu mutoza yamaze gufata icyemezo cyo kwitabaza Ishyirahamwe ry’Umupira w’Amaguru ku Isi (FIFA), asaba kwishyurwa imishahara yose yari asigaje ku masezerano.

Ku wa 13 Mutarama 2026, ni bwo FERWAFA yasohoye itangazo rigaragaza ko ryahagaritse Adel Amrouche mu nshingano ze zo gutoza Amavubi, rivuga ko hari ibyo atubahirije mu masezerano y’akazi.

Muri iryo tangazo, FERWAFA yagize iti: “Yahagaritswe mu nshingano ze nk’umutoza mukuru w’Ikipe y’Igihugu y’Abagabo nyuma y’isesengura ryimbitse ryagaragaje ko atubahirije ingingo ya 17.2 y’amasezerano y’umurimo.”

FERWAFA yanavuze ko Amrouche yari yarahawe igihe gihagije cyo gukemura ibyo bibazo, ikanizeza ko izakomeza gutanga andi makuru kuri iyi dosiye uko bigenda bitera imbere.

Amakuru The Drum yamenye agaragaza ko Adel Amrouche ashinjwa kuba yaravuye mu kazi akigira iwabo muri Algeria, mu gihe yagombaga kuba ari mu Rwanda akurikirana shampiyona y’imbere mu gihugu, by’umwihariko abakinnyi bashoboraga guhamagarwa mu Ikipe y’Igihugu. Anashinjwa kudatanga raporo z’akazi nk’uko byari biteganyijwe.

Ku rundi ruhande, abantu begereye uyu mutoza bavuga ko we yiregura avuga ko nta kosa yakoze, ko atigeze ata akazi, ahubwo ko ari FERWAFA yamusohoye mu nzu yari acumbitsemo, akagerageza kubimenyesha abayobozi be ariko ntibigire icyo bitanga.

INDI NKURU WASOMA:Kepler yasinyishije umunya – Puerto Rico

Ngo ibi byatumye afata icyemezo cyo gusubira iwabo, anavuga ko yahembwaga nabi ndetse akamara igihe adahembwa.

Adel Amrouche yamaze kuregera FIFA asaba imishahara y’amezi 14 yari asigaye ku masezerano y’imyaka ibiri yasinyiye muri Gashyantare 2025.

Umushahara we wari amadorali ibihumbi 25 ku kwezi, bivuze ko arishyuza amadorali ibihumbi 350, angana n’asaga miliyoni 500 z’amafaranga y’u Rwanda, ashobora no kwiyongeraho indishyi z’akababaro.

Si ubwa mbere FERWAFA yisanga mu bibazo nk’ibi, kuko mu 2018 yategetswe na FIFA kwishyura Jonathan McKinstry amafaranga asaga miliyoni 150 Frw nyuma yo kumwirukana binyuranyije n’amategeko.