RPL – Murenzi Abdallah yijeje aba-Rayons intsinzi imbere ya Al Hilal

Perezida wa Rayon Sports, Murenzi Abdallah, yagaragaje icyizere gikomeye mbere y’umukino w’ingenzi w’ikirarane  uzahuza ikipe ayoboye na Al Hilal, uteganyijwe kuri uyu wa Gatandatu kuri Stade Kigali Pelé saa kumi n’ebyiri n’igice z’umugoroba.

Uyu mukino uje mu gihe Rayon Sports ishaka kwisubiza icyizere nyuma yo gutsindwa bikomeye na APR FC mu Gikombe kiruta ibindi cya FERWAFA.

Mu kiganiro yagiranye n’ikinyamakuru k’ikipe, Murenzi yavuze ko abakinnyi biteguye neza kandi bafite ubushake bwo kugarura ibyishimo by’abafana.

Yagize ati: “Ndizera ko tuzakina neza muri uyu mukino. Al Hilal ni ikipe ikomeye, ariko natwe turi ikipe ikomeye. Turashaka ko ibyishimo abafana batabonye ku mukino wa APR FC babibonera mu wo tuzahuramo na Al Hilal.”

Rayon Sports izakira Al Hilal iri mu bihe byiza nyuma yo gutsinda Amagaju FC ibitego 8-0, ibintu byerekana ko ari ikipe ikomeye igomba kwitonderwa.

Gusa, Murenzi yemeje ko Rayon Sports yiteguye guhangana nayo, ashimangira ko gutsindwa na APR FC byatanze amasomo akomeye ku ikipe.

Yagize ati: “Twakuye amasomo menshi mu mukino wa APR FC. Dufite abakinnyi beza ku giti cyabo, igisigaye ni uko barushaho kumenyera gukinana no kumva neza umutoza mushya.” Yongeyeho ko impinduka ziri kugaragara uko iminsi igenda ihita.

INDI NKURU WASOMA :U Rwanda ruri kwitegura kwipima na Gabon

Uyu mukino uzabamo igihombo kuri Rayon Sports kuko izaba idafite Asman Ndikumana, uri mu gihano cyafashwe n’umutoza Bruno Ferry. Nubwo bimeze bityo, ubuyobozi bw’ikipe buracyafite icyizere cy’uko abandi bakinnyi bazitwara neza.

Murenzi yanagarutse ku bibazo by’imari n’imiyoborere byagiye bivugwa muri Rayon Sports, avuga ko komite ayoboye iri kubikemura buhoro buhoro kugira ngo ikipe ibe mu mwuka mwiza wo gutsinda.

Kuri ubu Rayon Sports iri ku mwanya wa cyenda n’amanota 24.