Gabon yisubiyeho ku byemezo yafatiye abarimo Aubameyang

Leta ya Gabon yatangaje ko yakuyeho ibihano yari yafatiye ikipe y’igihugu y’umupira w’amaguru izwi nka Panthers, birimo n’ibyari byarafatiwe rutahizamu wayo w’icyamamare Pierre-Emerick Aubameyang, nyuma yo gutsindwa nabi mu gikombe cya Afurika cya 2025 (Afcon).

Ikipe ya Gabon yari yitwaye nabi mu mikino ya nyuma yabereye muri Maroc, aho yasoreje ku mwanya wa nyuma mu itsinda F.

Ibi byatumye Minisitiri wa Siporo wariho icyo gihe, Simplice-Désiré Mamboula, atangaza ko umusaruro w’iyo kipe ari igisebo ku gihugu.

Ku itariki ya 1 Mutarama, yahise atangaza ihagarikwa ry’ikipe by’agateganyo, yirukana umutoza Thierry Mouyouma, anirukana mu ikipe Aubameyang n’umukinnyi wari kapiteni, Bruno Ecuele Manga.

Icyakora, Minisitiri mushya wa Siporo muri Gabon, Paul Ulrich Kessany, yatangaje kuri uyu wa Mbere ko ayo mabwiriza yose yavanyweho.

Icyo cyemezo cyafashwe mu rwego rwo kwirinda ibihano bikomeye byashoboraga gufatirwa ishyirahamwe ry’umupira w’amaguru muri Gabon (Fegafoot) n’ishyirahamwe mpuzamahanga ry’umupira w’amaguru ku isi, Fifa.

Fifa imaze igihe ifata umwanzuro ukakaye ku bijyanye n’ivanga rya politiki mu micungire y’amashyirahamwe y’umupira w’amaguru, bityo icyemezo cya Guverinoma ya Gabon cyashoboraga kuyishyira mu kaga.

INDI NKURU WASOMA :U Rwanda ruri kwitegura kwipima na Gabon

Mu itangazo ryashyizwe ahagaragara na Fegafoot, ryavuze ko Minisitiri Kessany yibukije ishyirahamwe ibihe ntarengwa biri imbere, birimo tombola yo gushaka itike y’Igikombe cya Afurika cya 2027. Fegafoot yashimye icyemezo cya Leta, ivuga ko ari intambwe nziza iganisha ku gukemura ikibazo.

Minisitiri Kessany kandi yasabye Fegafoot kumuha amakuru yose ajyanye n’uburyo buzakoreshwa mu guhitamo abatoza bashya bazasimbura Thierry Mouyouma, mu rwego rwo kongera kubaka ikipe y’igihugu ifite icyerekezo n’icyizere cy’ejo hazaza.