FERWAFA yahaye umucyo ugutandukana na Adel Amrouche

Ishyirahamwe ry’Umupira w’Amaguru mu Rwanda (FERWAFA) ryatangaje ko ryamaze gutandukana burundu n’umutoza w’Umunya-Algeria, Adel Amrouche, wari umaze amezi make ayobora Ikipe y’Igihugu y’u Rwanda, Amavubi.

Iki cyemezo cyafashwe nyuma yo gusanga atarubahirije ibikubiye mu masezerano y’akazi yari afitanye n’iri shyirahamwe.

Mu itangazo ryashyizwe ahagaragara mu ijoro rishyira kuri uyu wa Gatatu, FERWAFA yavuze ko Amrouche yahagaritswe mu nshingano ze hashingiwe ku ngingo ya 17.2 y’amasezerano y’akazi, nyuma y’isesengura ryimbitse ryagaragaje amakosa akomeye mu myitwarire n’imikorere ye.

Amakuru yizewe agera kuri The Drum avuga ko imbarutso nyamukuru y’iri yirukanwa ari uko uyu mutoza yagiye i Burayi atabiherewe uruhushya n’ubuyobozi bwe, ibintu byafashwe nko guta akazi.

Nyuma y’aho FERWAFA imwandikiye imusaba ibisobanuro, Amrouche yagerageje gusobanura ko yari mu rugendo rw’akazi, ajya no muri Azerbaijan gusura bamwe mu bakinnyi barimo Mutsinzi Ange na bamwe mu bavandimwe ba Mickels.

Gusa amakuru atandukanye avuga ko uru rugendo rutari ruri muri gahunda z’Ikipe y’Igihugu, ahubwo rwari uburyo bwo kugerageza guhisha ko yari yavuye mu Rwanda mu buryo bunyuranyije n’ibiteganywa n’amategeko n’amasezerano.

INDI NKURU WASOMA :Uwakoze muri Rayon Sports imyaka irenga 30 yitabye Imana

Uretse ikibazo cy’imyitwarire, n’umusaruro wa Amrouche ku rwego rw’ikibuga ntiwari mwiza. Kuva yahabwa izi nshingano muri Gashyantare 2025 asimbuye Frank Torsten Spittler, yahaye intsinzi Amavubi mu mikino umunani, atsindamo umwe gusa, anganya umwe, atsindwa itandatu. Muri rusange, u Rwanda rwatsinze ibitego bibiri gusa mu gihe rwatsinzwe 10.

Hari kandi kutanyurwa kwagaragajwe n’ubuyobozi bwa FERWAFA ku mahitamo ye y’abakinnyi, aho bamwe bafite ubushobozi bugaragara batongeye guhamagarwa, barimo Hakim Sahabo na Samuel Geulette bakinira amakipe akomeye mu Bubiligi.

Adel Amrouche asize Amavubi yitegura imikino ya gicuti ya FIFA Series izabera i Kigali muri Werurwe, ndetse n’amajonjora ya CAN 2027 ateganyijwe gutangira vuba.