Volleyball : APR yashimiwe n’uwahoze ari umutoza wayo

Nyuma yo kutongererwa amasezerano yo gukomeza gutoza APR Women Volleyball Club, Umutoza Peter Kamasa yasezeye kuri iyi kipe asiga ayigeneye ubutumwa bwuje ishimwe, ishema n’amarangamutima y’umwihariko, agaragaza urugendo rw’imyaka ibiri yamaze ayibereye umutoza mukuru.

Kamasa yagizwe Umutoza Mukuru wa APR WVC mu Ukuboza 2023, avuye muri East Africa University Rwanda Women Volleyball Club. Icyo gihe, yaje afata ikipe yari ifite intego zo kongera kwiyubaka no guhatanira ibikombe, ibintu byaje kugerwaho mu gihe gito ugereranyije.

Nyuma y’uko amasezerano ye arangiye, ubuyobozi bwa APR WVC bwahisemo kudakomezanya na we, buha inshingano zo gutoza by’agateganyo Igihozo Cyuzuzo Yvette, mu gihe hakomeje gushakwa umutoza mushya uzafata izi nshingano burundu.

Mu butumwa bwe bwo gusezera, Kamasa yavuze ko atewe ishema no kuba yaragize uruhare mu gukura abakinnyi bakagera ku rwego rwo kuba icyitegererezo mu yandi makipe yo mu Rwanda.

Yagize ati: “Nyuma y’imyaka ibiri y’imikino yari myiza, igihe cyanjye cyo gusezera kirageze kuko amasezerano yanjye yarangiye. Iyi kipe yari irenze kuba ikipe, ahubwo yari yarahindutse urugo. Ibihe twagiranye bizahora mu mutwe wanjye.”

INDI NKURU WASOMA :Ndikumana Asman yahagaritswe icyumweru

Yakomeje ashimira abakinnyi ku bwitange n’umurava bagaragaje, haba mu kibuga no hanze yacyo, avuga ko kubabona bakura no guhangana n’ibigeragezo bitandukanye ari agaciro azahorana.

Kamasa yanashimiye by’umwihariko ubuyobozi bwa APR WVC bwamuhaye amahirwe yo gutoza imwe mu makipe akomeye muri Volleyball y’u Rwanda, agaragaza ko imirimo ikorerwa inyuma y’amarido yagize uruhare runini mu ntsinzi yagezweho.

Mu gihe yamaze muri APR WVC, Kamasa yayihesheje ibikombe umunani mu marushanwa 12 yakinnye, birimo Igikombe cya Shampiyona 2024, Nyerere International Tournament 2024, Kayumba Memorial Tournament (2024 na 2025), Genocide Memorial Tournament 2024, Zone V Championship 2025 na Rutsindura Memorial Tournament (2024 na 2025).