OFFICIAL -Michael Carrick aragijwe Manchester United by’agateganyo

Ikipe ya Manchester United yamaze kumvikana na Michael Carrick ku mwanya w’umutoza mukuru w’agateganyo, aho azungirizwa n’uwahoze ari umutoza wungirije w’ikipe y’igihugu y’u Bwongereza, Steve Holland.

Iyi ni intambwe ikomeye kuri  iyi kipe ikinira kuri Old Trafford iri mu bihe bikomeye nyuma yo kwirukana Ruben Amorim ku itariki ya 5 Mutarama, nyuma y’amezi 14 ataragera ku musaruro wifuzwa.

Carrick, wahoze ari umukinnyi w’ingenzi wa United no mu Bwongereza hagati mu kibuga, yemeye amasezerano ku mugoroba wo ku wa Mbere, bikaba biteganyijwe ko azatangazwa ku mugaragaro ku mugoroba wo kuri uyu wa Kabiri nyuma yo gusinya inyandiko zose.

Azafashwa kandi na Jonathan Woodgate, Jonny Evans ndetse na Travis Binnion, bamwe basanzwe bazi neza umwihariko w’iyi kipe.

Umukino wa mbere Carrick azayobora uzaba ari derby ikomeye ya Premier League, aho Manchester United izakira Manchester City ku wa Gatandatu kuri Old Trafford.

Si ubwa mbere Carrick ayoboye iyi kipe by’agateganyo, kuko no mu 2021 yayoboye imikino itatu nyuma yo kwirukanwa kwa Ole Gunnar Solskjaer.

INDI NKURU WASOMA :Yanga SC yaguze akayabo rutahizamu wifuzwaga na APR FC

Steve Holland ni izina rikomeye mu batoza, cyane cyane kubera akazi yakoze afatanyije na Gareth Southgate mu ikipe y’igihugu y’u Bwongereza, aho bageze ku mwanya wa kane mu gikombe cy’Isi cya 2018 ndetse bakaba aba kabiri muri Euro ya 2021 na 2024.

N’ubwo aherutse kwirukanwa muri Yokohama F. Marinos yo mu Buyapani, ubunararibonye bwe buracyari ingenzi cyane.Carrick yanagiranye ibiganiro imbonankubone n’ubuyobozi bwa United, birimo umuyobozi mukuru Omar Berrada na Jason Wilcox ushinzwe umupira, abashimishijwe n’icyerekezo cye.

Biteganyijwe ko azakoresha sisiteme ya 4-2-3-1, ahindura uburyo Amorim yakinaga bwo gushyira ba myugariro batatu inyuma.