Basketball :Tigers yasinyishije Nyamwasa Bruno na Shyaka Olivier

Ikipe ya Tigers Basketball Club ikomeje kwerekana ko intego zo kwitwara neza mu mwaka w’imikino wa 2026 igomba kuzesa, nyuma yo gusinyisha abakinnyi babiri bakomeye bavuye mu makipe akomeye mu Rwanda, ari bo Nyamwasa Bruno na Shyaka Olivier.

Nyamwasa Bruno wakiniraga Patriots Basketball Club, ndetse na Shyaka Olivier wahoze muri REG Basketball Club, bashyize umukono ku masezerano y’imyaka ibiri bazakinira Tigers BBC.

Ibi byabaye mu rwego rwo gukomeza kongerera imbaraga iyi kipe, yitegura gukina Shampiyona y’u Rwanda izatangira tariki ya 6 Gashyantare 2026, ndetse n’imikino ya Zone V izahagarariramo u Rwanda.

Shyaka Olivier, wari umaze imyaka umunani muri REG BBC, azanye ubunararibonye n’ubuyobozi mu kibuga, cyane ko yari umwe mu nkingi za mwamba z’iyo kipe mu myaka ishize.

Ku rundi ruhande, Nyamwasa Bruno w’imyaka 29, wari umaze imyaka ine muri Patriots BBC, azanye ubuhanga n’ubunararibonye bwo ku rwego mpuzamahanga, byitezweho gufasha Tigers BBC kugera ku ntego zayo.

INDI NKURU WASOMA :Imbamutima za Xabi Alonso uherutse kwerekwa imiryango na Real Madrid

Aba bakinnyi bombi biyongereye ku bandi batatu Tigers BBC yasinyishije mu Ukuboza 2025, barimo Albert Odero wahoze akinira Nairobi City Thunder, Antino Jackson na Hagumintwari Steve. Ibi byose bigaragaza ko iyi kipe iri gushyira imbaraga mu kwiyubaka mu buryo burambye.

Si mu bakinnyi gusa Tigers BBC iri kwiyubaka, kuko yanongereye imbaraga mu batoza. Kenneth Wilson Gasana yinjijwe mu batoza b’iyi kipe, aho azakorana na Henry Mwinuka wayihesheje Igikombe cya Rwanda Cup 2025.