FERWAFA igiye gushyira miliyoni 100 muri ruhago y’Abagore

Ishyirahamwe ry’Umupira w’Amaguru mu Rwanda (FERWAFA) ryatangaje ko ryateganyije Ingengo y’Imari ingana na Miliyoni 102,550,000 Frw izakoreshwa mu guteza imbere umupira w’amaguru w’Abagore muri uyu mwaka.

Iyi ngengo y’imari yatangarijwe mu Nama y’Inteko Rusange Isanzwe yahuje abanyamuryango ba FERWAFA, aho haremejwe gahunda zitandukanye zigamije guteza imbere ruhago nyarwanda mu byiciro byose.

Muri iyo nama, abayobozi bagarutse ku kamaro ko gukomeza gushyira imbaraga mu mupira w’abagore, ukomeje kwerekana iterambere rishimishije mu myaka ishize.

Komiseri Ushinzwe Imari muri FERWAFA, Nshuti Thierry, ni we wagaragaje iyi ngengo y’imari, anatangaza ko muri rusange ishyirahamwe riteganya gukoresha amafaranga arenga Miliyari 14 Frw mu mwaka wa 2026.

Muri ayo mafaranga, ni ho hazakomoka ingengo y’imari izafasha mu bikorwa byose bijyanye no guteza imbere umupira w’amaguru w’abagore.

Aya mafaranga ateganyijwe azifashishwa mu bikorwa bitandukanye birimo gutegura amarushanwa y’abagore, gufasha amakipe mu myitozo no mu mikino, kongera ubumenyi ku batoza n’abasifuzi b’abagore, ndetse no gushyigikira gahunda zigamije gushishikariza abakobwa bato kwinjira mu mupira w’amaguru.

INDI NKURU WASOMA :APR FC yegukanye Super Cup ya 2025 inyagiye Rayon Sports

FERWAFA ivuga ko ishoramari rikomeje gushyirwa mu mupira w’abagore riri gutanga umusaruro, aho buri mwaka hagaragara impano nshya ndetse n’izamuka ry’urwego rw’amarushanwa yo mu gihugu. Ibi bitanga icyizere cy’uko, mu gihe abareberera uyu mupira bakomeza uwo muvuduko, ejo hazaza h’umupira w’amaguru w’abagore mu Rwanda hazaba heza kurushaho.

Iyi gahunda kandi igaragaza icyerekezo FERWAFA ifite cyo guteza imbere ruhago mu buryo bwuzuye, aho abagore bahabwa umwanya n’amahirwe angana n’ay’abandi bose.