Harimo imikino izaba saa tatu z’ijoro – Rwanda Premier League yatangaje izindi mpinduka!

Ubuyobozi bwa Rwanda Premier League (RPL) bwatangaje impinduka ku ngengabihe y’imikino ya Mutarama, zirimo n’umukino wa mbere mu mateka y’iyi shampiyona uzatangira Saa Tatu z’ijoro .

Izi mpinduka zigamije korohereza isozwa ry’imikino y’igice cya mbere cy’umwaka w’imikino wa 2025/26 hadakomeje kubaho gutinda.

Ku wa 11 Mutarama, Al Merrikh SC izacakirana na Mukura VS guhera Saa Kumi n’Ebyiri z’umugoroba (6:00 PM), mu gihe Al Hilal SC izahura na Amagaju FC Saa Tatu z’ijoro, bikaba ari bwo bwa mbere umukino wa Shampiyona y’u Rwanda utangiye kuri iyo saha idasanzwe.

Indi mikino ikomeye yahuye n’izi mpinduka harimo uwa APR FC izakira Al Merrikh SC kuri Stade Amahoro ku wa 17 Mutarama Saa Kumi n’Imwe n’Igice z’umugoroba (5:30 PM).

Bukeye bwaho, Rayon Sports izakira Al Hilal SC Saa Kumi n’Ebyiri z’umugoroba (6:00 PM), mu gihe Gikundiro izongera guhura na Al Merrikh SC ku wa 21 Mutarama.

Hari n’indi mikino yimuriwe ahandi kubera impamvu z’ibikorwaremezo. Amagaju FC azakira APR FC i Muhanga ku wa 14 Mutarama, naho Mukura VS izahakinira na Rayon Sports kuri iyo stade ku wa 24 Mutarama.

Ibi byemezo byafashwe bitewe n’uko Stade Huye, isanzwe yakira imikino ya Amagaju FC na Mukura VS, imaze amezi arindwi iri mu mirimo yo kuyivugurura kandi itaritegura kwakira imikino mbere ya Gashyantare.

INDI NKURU WASOMA :APR yatandukanye n’umutoza wayo

Mu rwego rwo kwirinda gukomeza gusubika imikino, RPL yahisemo kwimurira imikino yose yari iteganyijwe gukinirwa i Huye kuri Stade ya Muhanga. Harimo n’imikino itari yarashyirwa ku ngengabihe irimo Al Hilal SC izahura na APR FC ndetse na Al Hilal SC izacakirana na Al Merrikh SC.

Ubuyobozi bwa RPL bwemeje ko igice cya kabiri cya Shampiyona giteganyijwe gutangira ku wa 30 Mutarama, bityo izi mpinduka zigamije gutuma umwaka w’imikino ukomeza mu murongo hatabayeho izindi nzitizi.