Gabriel Martinelli yasabye imbabazi Conor Bradley

Premier League : Arsenal 0 – 0 Liverpool

Mu mukino wahuje Arsenal na Liverpool warangiye ari ubusa ku busa (0-0) wabereye kuri Emirates Stadium, habayeho igikorwa cyateje impaka nyinshi cyakozwe n’umukinnyi wa Arsenal, Gabriel Martinelli.

Uyu musore yasabye imbabazi nyuma yo gusunika myugariro wa Liverpool, Conor Bradley, wari wakomeretse, agamije kumukuraho mu kibuga ngo umukino ukomeze.

Ibi byabaye mu minota ya nyuma y’umukino, Bradley akurikiye umupira agwa nabi hafi y’umurongo w’ikibuga, ahita afata ivi agaragaza ko ababaye cyane.

Mu gihe yari aryamye hasi ari kubabara, Martinelli yamwegereye amushyiraho umupira mbere yo kumusunika mu mugongo, ibintu byarakaje abakinnyi ba Liverpool n’abandi bakurikiye umukino.

Ibyo byahise bitera imvururu hagati y’amakipe yombi, maze umusifuzi aha Martinelli n’Umunya-Guinée Ibrahima Konaté amakarita y’umuhondo.

Bradley yaje guhabwa ubufasha bwihuse, avanwa mu kibuga atwawe n’abantu bamufasha, nyuma agaragara ava kuri stade akoresheje inkoni kandi yambaye igikoresho gifata ivi.

Abahoze bakinira Manchester United,barimo Gary Neville na Roy Keane, banenze bikomeye imyitwarire ya Martinelli, bayita idakwiye umupira w’amaguru w’umwuga.

Neville yavuze ko ibyo yakoze ari “igisebo”, ashimangira ko ubuzima bw’umukinnyi bugomba kuza mbere ya byose.

Nyuma y’umukino, Martinelli yifashishije imbuga nkoranyambaga asaba imbabazi, avuga ko atigeze amenya ko Bradley yakomeretse bikomeye.

Yagize ati: “Mu bushyuhe bw’umukino, sinasobanukiwe ko yari yakomeretse cyane. Ndicuza cyane ku byo nakoze kandi nifuriza Conor gukira vuba.”

Umutoza wa Liverpool, Arne Slot, yagerageje gusobanura uko byagenze, avuga ko ikibazo rusange cyo gutinza umukino (time-wasting) gikunze kubaho gishobora kuba cyaratumye Martinelli abifata nabi.

Na Mikel Arteta utoza Arsenal yavuze ko Martinelli ari umusore mwiza, kandi ko nta mugambi mubi yari afite.