FERWAFA yatangaje ibirango n’inyito nshya bya shampiyona y’abagore

Ishyirahamwe ry’Umupira w’Amaguru mu Rwanda (FERWAFA) ryatangaje impinduka nshya mu mupira w’amaguru w’abagore, aho icyiciro cya mbere cyahinduriwe izina kikitwa “Rwanda Women’s Super League”, kivuye ku izina cyari gisanzwe kizwiho cya D1 Women.

Ibi byatangajwe ku mugaragaro mu muhango wabereye ku cyicaro gikuru cya FERWAFA kuri uyu wa Gatanu tariki ya 9 Mutarama 2026, mu gikorwa cyitabiriwe n’abayobozi batandukanye b’umupira w’amaguru mu Rwanda.

Komiseri ushinzwe umupira w’amaguru w’abagore muri FERWAFA, Nikita Gicanda, yasobanuye ko guhindura izina n’ibirango by’iyi shampiyona bigamije kongera kumenyekanisha no guha agaciro umupira w’abagore. Yavuze ko kuba utavugwa cyane ari imwe mu mpamvu zituma n’ibitangazamakuru bitawitaho uko bikwiye, aho usanga batohereza abanyamakuru kujya gukurikirana imikino y’abagore.

Perezida wa FERWAFA, Shema Ngoga Fabrice, we yashimangiye ko izi mpinduka zigamije gutuma amakipe n’abakinnyi bumva ko ibyo bakora bifite agaciro kandi bifite ejo hazaza heza. Yagize ati: “Buri cyiciro twagiye tugishakira izina, tugiha ikirango cyacyo, kugira ngo abagitabira bumve ko bifite agaciro.”

Yakomeje asobanura ko icyiciro cya kabiri kizitwa Championship, mu gihe icyiciro cya gatatu kizaba ari Regional Champions League. Ibi byose bikaba bigamije gutunganya imiterere ya shampiyona y’abagore no kuyigira iy’umwuga kurushaho.

Shema Fabrice kandi yatangaje ko imikino ya Rwanda Women’s Super League izajya igaragara kuri FIFA Plus, ku buntu, ku muntu wese uzaba wifuza kuyireba, bikazafasha kuyamamaza ku rwego mpuzamahanga.

Shampiyona y’icyiciro cya mbere mu mupira w’amaguru w’abagore mu Rwanda ikinwamo amakipe 12, aho amakipe atandatu ya mbere azajya ahembwa, mu rwego rwo gushishikariza amarushanwa no kuzamura urwego rw’imikinire.