Umutoza wa Strasbourg mu muryango winjira muri Chelsea

Nyuma y’itandukana rya Chelsea na Enzo Maresca ku wa Kane , ibiganiro byo gushaka umutoza mushya byahise bitangira, kandi izina rya Liam Rosenior utoza Strasbourg riri ku isonga mu bavugwa cyane.

Maresca, w’imyaka 45, yasezeye ku mirimo ye kubera kutumvikana n’ubuyobozi bukuru bwa Chelsea n’abayishoyemo imari, ibintu byagize ingaruka no ku itsinda rye ry’abungiriza, nk’uko byagaragajwe n’ubutumwa bwashyizwe ku mbuga nkoranyambaga n’umunyezamu Robert Sanchez.

Amakuru amaze gutangazwa n’ikinyamakuru GiveMeSport avuga ko Rosenior, w’imyaka 41, ashyigikiwe cyane n’abayobozi ba Chelsea, by’umwihariko kubera ko ikipe atoza, Strasbourg, na yo iri mu maboko ya BlueCo, sosiyete yaguze Chelsea mu 2022.

 Ibi byatumye abasesenguzi benshi bemeza ko kugera kwa Rosenior i Stamford Bridge byaba byoroshye kurusha uko byakorwa ku bandi batoza.

INDI NKURU WASOMA :Imbamutima za Bernado Silva nyuma Man City ihaye urwaho Arsenal

Rosenior yamenyekanye cyane mu mwaka ushize ubwo yajyanaga Strasbourg mu marushanwa y’i Burayi nyuma yo gusoza shampiyona y’u Bufaransa ku mwanya wa karindwi.

 Uburyo bwe bwo guteza imbere abakinnyi bakiri bato, imikinire ye ituma ikipe igumana umupira, n’ubushobozi bwo gucunga neza abakinnyi byatumye ahuzwa n’amakipe menshi yo ku mugabane w’u Burayi, harimo na Bayer Leverkusen.

Nubwo ari we uhabwa amahirwe menshi, Chelsea iracyareba n’abandi batoza. Francesco Farioli wa Porto ari mu bavugwa cyane, cyane ko amaze gutangira neza shampiyona ya Portugal, aho ikipe ye iyoboye urutonde. Hari kandi amazina nka Roberto De Zerbi wa Marseille na Kieran McKenna wa Ipswich, bombi basanzwe bazwiho gutanga umusaruro mwiza mu makipe batoje.

Mu gihe Chelsea ikomeje gushakisha umutoza uzayifasha kugumana umwimerere wayo w’imikinire, Calum McFarlane, utoza ikipe y’abatarengeje imyaka 21, ni we uyoboye by’agateganyo, akaba ari na we utegerejwe kuyitoza mu mukino wo ku Cyumweru izahuramo na Manchester City.