Imbamutima za Bernado Silva nyuma Man City ihaye urwaho Arsenal

PREMIER LEAGUE : Sunderland 0 -0 Man City

Mu gihe shampiyona y’u Bwongereza igeze mu gice cya kabiri, isiganwa ryo kwegukana igikombe rikomeje gufata indi ntera, ariko Manchester City yatangiye gutakaza amanota y’ingenzi.

Nyuma yo kunganya ubusa ku busa na Sunderland mu mukino wabereye kuri Stadium of Light, City yasigaye inyuma ya Arsenal ho amanota ane, ibintu byatumye Pep Guardiola yibaza niba koko iri siganwa rikiri iry’amakipe abiri gusa.

Uyu mukino wabaye mu ijoro ryo ku munsi wa mbere wa 2026. Nubwo City yigaranjije mu guhererekanya umupira ku kigero cya 67% ikanatera amashoti 14, yananiwe gutsinda igitego na kimwe kubera ubwirinzi bukomeye bwa Sunderland, yaguye miswi ikomeza kudatsindwa mu rugo muri iyi shampiyona.

Bernardo Silva, kapiteni wa City, yemeye ko batitwaye neza mu gice cya mbere cy’umukino. Yagize ati: “Mu gice cya mbere ntitwigenzuye neza umukino wacu, twateye vuba cyane tutabanje gushaka imyanya. Mu gice cya kabiri twabonye amahirwe menshi, ariko uyu munsi ntibyadukundiye kuyabyaza umusaruro.”

Nubwo umukino warangiye nta gitego kibonetse, wari uryoheye abakunzi b’umupira w’amaguru kuko impande zombi zagize amahirwe yo gutsinda.

INDI NKURU WASOMA :Gicumbi FC yakaniye kwegukana amanota ya Al Hilal

Abafana ba Sunderland barushijeho kugira icyizere uko umukino wagendaga, mu gihe City yakomeje gushaka urufunguzo rwo gufungura ubwugarizi  bw’aya mapusi y’umukara gusa irarubura.

Ku ruhande rwa City, inkuru nziza ni ukugaruka kwa Rodri nyuma y’igihe kinini avunitse. Yinjiye mu gice cya kabiri ahita ahindura umukino, bituma Guardiola avuga ko ari we mwiza mu mwanya we kandi ko kubura kwe kwari kwabaye icyuho gikomeye. Gusa kandi Savinho na Nico Gonzalez bongeye guca amarenga yo kugira  imvune.

City igiye gutangira uruhurirane rw’imikino 10 mu marushanwa ane atandukanye kugeza tariki ya 1 Gashyantare.