AFCON2025-Nigeria yasezereye umuturanyi w’u Rwanda mu gikombe cy’Afurika

Ikipe y’igihugu ya Nigeria yakomeje kugaragaza imbaraga n’ubuhanga mu irushanwa ry’Igikombe cya Afurika (AFCON) itsinda Uganda ibitego 3-1, umukino wayo wa nyuma mu itsinda C, byatumye isoza imikino y’amatsinda ifite amanota icyenda (9).

Ni umukino wagaragaje ko Nigeria nta kosa ishaka gukora n’ubwo yari yararuhukije bamwe mu bakinnyi bayo basanzwe babanza mu kibuga kuko yaje gukina uwo mukino ifite itike ya 1/8 cy’irangiza kandi ubizi neza ko izayobora n’itsinda ryabo.

Kurundi ruhande Uganda yagize ibyago mw’izamu ryabo nyuma y’iminota 46’ Umukino utangiye, Kapiteni wabo Denis Onyamgo yahuye n’Ikibazo cy’Imvune asimburwa na Salim Jamal Magoola, ku munota wa 56’, Magoola yaje gukora ikosa rikomeye ryo gukoresha intoki hanze y’urubuga rwe ashaka guhagarika umupira wari utere na Rutahizamu wa Nigeria,Victor Osimhen. Ibyo byatumye ahabwa ikarita itukura, Uganda basigara ari abakinnyi 10.

Uganda yahise ishyiramo Umunyezamu wabo wa  3 Nafian Alionzi, Bakuyemo umukinnyi w’imbere witwa Baba Alhassan, Nigeria akazi kahise kaborohera kuva ubwo kugeza umukino urangiye.

Raphael Onyedika yatsinze ibitego bibiri, mu gihe Paul Onuachu yatsinze igitego cye cya mbere mu ikipe y’igihugu nyuma y’imyaka ine.

Onuachu yafunguye amazamu ku munota wa 28’ nyuma y’umupira mwiza yari ahawe na Fisayo Dele-Bashiru, awushyira mu rushundura neza igitego cya mbere cya Nigeria kiba kirabonetse.

INDI NKURU WASOMA : Uwanyuze muri Patriots yabonye ikipe muri Indonesia

Nigeria yakomeje gukoresha neza ayo mahirwe, Onyedika atsinda igitego cya kabiri ku munota wa 62’, Ku munota wa 67’ yaje gutsinda Kiki ndi gitego nyuma y’iminota 5 gusa, byombi byaturutse ku mipira ya Samuel Chukwueze. Uganda yabonye igitego cy’ihumure ku munota wa 75 gitsinzwe na Rogers Mato, ariko nticyari gihagije.

Mu itsinda C, Nigeria yasoreje ku mwanya wa mbere, ikurikirwa na Tunisia ya kabiri, mu gihe Tanzania nayo yageze mu cyiciro gikurikiyeho nyuma yo kunganya 1-1 na Tunisia. Ni intambwe ikomeye kuri Tanzania, yabigezeho ku nshuro ya mbere mu myaka 45.