‘Turashaka kwegukana ibikombe bine uyu mwaka’ – William Saliba

Myugariro w’umufaransa ukinira Arsenal, William Saliba,  yatangaje ko iyi kipe yo mu mujyi wa Londres ishobora gukora ibidasanzwe muri uyu mwaka w’imikino igatwara ibikombe bine byose iri guhatanira, ibintu byafashwe nko gutinyuka ariko bifite ishingiro rishingiye ku byo Arsenal imaze kwerekana.

Ibi yabitangaje mu gihe Arsenal iri ku mwanya wa mbere muri Shampiyona y’u Bwongereza (Premier League) ndetse no mu itsinda ryayo muri UEFA Champions League.

Mu minsi ishize, Arsenal yanageze muri ½ cya Carabao Cup nyuma yo gutsinda Crystal Palace kuri penaliti ku kibuga cya Emirates Stadium, bikaba byatumye izahura na Chelsea mu mukino uteganyijwe muri Mutarama.

Saliba avuga ko nubwo gutwara ibikombe bine (quadruple) bigaragara nk’inzozi, atari ikintu kidashoboka kuri Arsenal y’uyu mwaka.

Yagize ati: “Yego, rwose turabitekereza, kuko mu marushanwa yose dukina tuba tuzi ko dushobora kuyatwara. Mu myaka itatu ishize twagiye tuba hafi gutwara Premier League, umwaka ushize tugera muri ½ cya Champions League na Carabao Cup, bivuze ko dufite ubushobozi bwo gutsinda irushanwa iryo ari ryo ryose.”

Uyu myugariro w’imyaka 23 yashimangiye ko icy’ingenzi atari amagambo ahubwo ari ibikorwa bigaragarira ku kibuga. Yavuze ko Arsenal igomba gutangira kugaragaza ko ishoboye gutwara ibikombe noneho, aho kuba guhora ivuga ko iri hafi.

Ku bijyanye na Carabao Cup, Saliba yavuze ko basigaje imikino itatu gusa ngo begukane igikombe, ariko ko bagomba kubanza guhangana na Chelsea, umukino afata nk’udafite uko ungana.

Yongeyeho ko ari derby ikomeye isaba kwitonda no gukomeza icyizere, cyane cyane bigendanye n’amasomo bigiye ku byababayeho umwaka ushize.

Saliba yanibukije ko mu mpera z’umwuga w’umukinnyi, icyo abantu bibuka ari ibikombe yatwaye. Ku bwe, Carabao Cup ni kimwe mu bikombe bifite agaciro, kandi Arsenal ishaka kugitwara nk’uko ishaka gutsinda andi marushanwa yose irimo.

Nubwo bimeze bityo, Saliba yavuze ko bagifite urugendo rurerure imbere, kuko tukiri mu Ukuboza kandi mu mupira w’amaguru ibintu bishobora guhinduka vuba.

Yashimangiye ko bagomba gukomeza kwibanda ku kazi, kwizera ubushobozi bwabo no gukorana umurava, kuko icy’ingenzi ari ukwegukana ibikombe mu mpera z’umwaka w’imikino, atari mbere.