Twabubashye turarenza! Umutoza wa Uganda nyuma yo gutsindwa na Tunisia

Nyuma yo gutsindwa ibitego 3–1 na Tunisia mu mukino wabereye i Rabat , umutoza w’ikipe y’igihugu ya Uganda, Paul Put, yemeye ko amakosa menshi yakozwe n’abakinnyi be, cyane cyane kugaragaza icyubahiro kirenze kubo bari bahanganye.

Ibi byabaye intangiriro itari nziza ku Mvubu (Cranes) mu marushanwa ya CAN 2025, ariko Put yemeza ko hari icyizere cyo kwisubiraho.

Tunisia yatangiye umukino isatira bikomeye, bituma Uganda ihita yisanga iri inyuma igomba kwiruka inyuma y’umukino wa Tunisia.

Put yavuze ko abakinnyi be bagaragaje umwete n’ishyaka mu gihe gito gusa, kigera ku minota 25 ya mbere  gusa mu gihe igice kinini cy’umukino bari bamaze basubira inyuma, bagatsindwa mu mipira yo mu kirere no mu mipira igaruka (second balls) .

Ati: “Twabahaye icyubahiro kirenze. Tuzi neza ko Tunisia ikomeye cyane mu mipira w’Afurika bitewe naho ihagaze. Iyi ni intangiriro mbi. Ntabwo twari twitwaye neza mu busatirizi no mu guhangana ku mipira yo mu kirere. Mu marushanwa nka AFCON, ugomba gutsinda duels. Niba ukina iminota 25 gusa neza, ntibihagije.”

INDI NKURU WASOMA :Rayon Sports yongeye guhura n’igihombo gikomeye mu bwugarizi bwayo

Uyu mutoza kandi yavuze ko amakosa make yakozwe yahise ahanwa n’ikipe ya Tunisia, yagaragaje ubunararibonye n’ubushobozi bwo kubyaza umusaruro buri cyuho cyagaragaye mu bwugarizi bwa Uganda.

Yongeyeho ko ubu igitutu cyiyongereye, kuko umukino ukurikiraho ugomba gutsindwa.

Ati: “Tuzi neza icyo tugomba gukora mu mukino utaha. Gutsinda ni byo byonyine byadufasha kuguma mu irushanwa, kuko kunganya ntibihagije. Tugomba gusesengura umukino, tukamenya aho twibeshye n’icyo twakosora. Nizeye ko dushobora kwisubiraho.”

Uganda izasubira mu kibuga tariki ya 27 Ukuboza 2025 itana mu mitwe na Tanzania .

Indi mikino yabaga mu itsinda C

• Nigeria 2-1 Tanzania,
• Tunisia 3-1 Uganda,