Rutahizamu wa Liverpool agiye kumara igihe kinini hanze

Ikipe ya Liverpool yemeje ko rutahizamu wayo, Alexander Isak, yagiriye ikibazo gikomeye cy’imvune ku kuguru kwe kw’ibumoso, aho yavunitse igupfwa ry’ukuguru , bigatuma abagwa by’ikugaho.

Mu itangazo ryashyizwe ahagaragara n’iyi kipe yo mu Bwongereza, Liverpool yatangaje ko uyu mukinnyi w’imyaka 26 yabazwe neza nyuma yo kugira imvune ku kaguru ikototera n’akagombambari.

Nubwo bimeze bityo, iyi kipe ntiyatangaje igihe nyacyo azamara adakina, ariko biravugwa ko ashobora kumara nibura amezi menshi ari hanze y’ikibuga.

Isak yavunitse ku wa Gatandatu mu mukino Liverpool yatsinzemo Tottenham, ubwo yinjiye mu kibuga asimbuye maze agatsinda igitego.

Gusa nyuma gato yo gutsinda, yagonganye bikomeye na myugariro wa Tottenham, Micky van de Ven, bituma agira ububabare bukabije atabasha gukomeza umukino. Yavuye mu kibuga afashijwe n’abaganga b’ikipe, bigaragara ko atameze neza.

INDI NKURU WASOMA : RPL -Bruno Ferry aratangirira urugendo rwe i Rubavu ;Police FC i Bugesera

Uyu rutahizamu w’Umusuwede ni we waguzwe amafaranga menshi kurusha abandi mu mateka ya Premier League, aho Liverpool yamuguze miliyoni 125 z’amapawundi mu mpeshyi ishize avuye muri Newcastle. Kuva yagera muri Liverpool muri Nzeri, Isak amaze gutsinda ibitego bitatu mu mikino 16 yakiniye iyi kipe.

Yatangiye gukina muri Liverpool mu mukino wa Champions League batsinzemo Atletico Madrid ku wa 17 Nzeri, atsinda igitego cya mbere mu ntsinzi ya 2-1 kuri Southampton. Gusa kuva icyo gihe, yagowe no kubona umwanya uhagije no kugaruka mu bihe byiza.