Basketball :uwakiniye ikipe y’igihugu yatangajwe nk’umutoza wa Tigers

Umwe mu nkingi za mwamba mu mateka ya Basketball y’u Rwanda, Kenneth Gasana, yasinye amasezerano y’umwaka umwe n’ikipe ya Tigers yo mu Cyiciro cya mbere, aho agiye gukorera nk’umutoza wungirije.

Ibi byemejwe ku wa Mbere n’umuyobozi wa Tigers, Francis Shyaka, mu kiganiro yagiranye n’itangazamakuru.

Aya masezerano azatuma Gasana, ufite imyaka 40, ajya mu muryango w’abatoza ba Tigers uyobowe na Henry Mwinuka, mu mwaka w’imikino wa 2026 uzatangira ku itariki ya 24 Mutarama 2026.

Ni intambwe nshya mu rugendo rwe rwa siporo, aho akomeje kugaragaza uruhare rwe mu guteza imbere Basketball y’u Rwanda atari nk’umukinnyi gusa, ahubwo no mu gutoza.

Mbere yo kwinjira muri Tigers, Gasana yari mu batoza b’ikipe y’igihugu y’u Rwanda yitabiriye icyiciro cya mbere cy’amajonjora yo gushaka itike y’Igikombe cy’Isi cya FIBA 2027 cyabereye i Radès muri Tuniziya mu kwezi k’Ugushyingo gushize.

INDI NKURU WASOMA :Rutahizamu wa Liverpool agiye kumara igihe kinini hanze

Nk’umukinnyi, Gasana yamenyekanye bwa mbere mu ikipe y’igihugu mu 2009 mu mikino ya AfroBasket yabereye muri Libya, aho yayoboye bagenzi be mu gutsinda amanota menshi, agira impuzandengo y’amanota 18.3 kuri buri mukino, anafasha u Rwanda gusoza ku mwanya wa 9, wari umwihariko mwiza icyo gihe.

Yakiniye amakipe atandukanye arimo ayo muri Maroc nka Hoceima na Plaza Sports, mbere yo kugaruka mu Rwanda akinira Patriots, aho bageze muri kimwe cya kabiri cya BAL mu mwaka wa mbere wayo.

Ku rwego mpuzamahanga, Gasana yabaye kapiteni w’ikipe y’igihugu mu majonjora y’Igikombe cy’Isi cya 2023, ananayobora u Rwanda muri AfroBasket 2023 yabereye i Abidjan, aho rwasoje ku mwanya wa 10 mu makipe 16.

Gasana yavukiye muri Leta ya Texas muri Leta Zunze Ubumwe za Amerika ku wa 9 Ugushyingo 1984.