Volleyball : REG na APR zihariye ibihembo muri shampiyona yo ku mucanga

Agace ka mbere ka shampiyona ngarukamwaka ya volleyball yo ku mucanga kasorejwe mu karere ka Rwamagana, ku nkengero z’ikiyaga cya Muhazi ahazwi nka Falcon Golf and Country Club.

Iyi mikino yabaye kuva tariki ya 19 kugeza ku ya 21 Ukuboza, ikaba yari igamije gutangiza shampiyona izakinwa mu byiciro bibiri muri uyu mwaka w’imikino.

Mu cyiciro cy’abagabo, ikipe yari igizwe na Paul Akan ukomoka muri Ghana na Gisubizo Merci wa REG VC ni yo yitwaye neza kurusha izindi, yegukana umwanya wa mbere.

Iyi kipe yatsinze ku mukino wa nyuma Nzirimo Mandela na Elivis amaseti 2-1 (24-22, 14-21, 15-11) mu mukino wari urimo ishyaka n’ihangana rikomeye.

Umwanya wa kabiri wegukanywe na Niyonshima Samuel na Mbonigaba Vincent, mu gihe Munezero na Shema basoreje ku mwanya wa gatatu.

INDI NKURU WASOMA :Nyuma y’umutoza ;Rayon Sports igiye kumanura umwataka

Igikombe cy’abagabo cyashyikirijwe Akan na Gisubizo n’Umuyobozi w’Akarere ka Rwamagana, Mbonyumuvunyi Radjab, washimye urwego rwiza rw’iri rushanwa n’uruhare rwaryo mu guteza imbere siporo mu ntara y’Iburasirazuba.

Mu cyiciro cy’abagore, ikipe ya Munezero Valentine na Uwiringiyimana Albertine, bombi basanzwe bakinira APR WVC, ni yo yegukanye igikombe.

Iyi kipe yatsinze ku mukino wa nyuma Yankurije Françoise na Nirere Aliane ba Police WVC amaseti 2-1 (21-14, 17-21, 15-8). Umwanya wa kabiri wegukanywe n’ikipe ya Ainembabazi Catherine wo muri Uganda na Sandra ukomoka muri Ghana, batsinze Tuyizere Angelique na Sifa amaseti 2-0.

Iyi shampiyona yitabiriwe n’amakipe 24 yose hamwe, abagabo n’abagore, aho mu bagabo hatabiriye amakipe 13 mu gihe mu bagore hatabiriye 11.

Guverineri w’Intara y’Iburasirazuba, Pudence Rubingisa, yari mu bayobozi n’abakunzi ba siporo bakurikiye iyi mikino.

Agace ka kabiri k’iyi shampiyona ya volleyball yo ku mucanga biteganyijwe ko kazakinwa muri Kanama 2026, kakazongera guhuza amakipe atandukanye mu guhatanira igikombe.