AFCON2025 – Imyato ikomeje kwivugwa mbere yuko South Africa na Angola bacakirana

SOUTH AFRICA                     19:00                                   ANGOLA

Irushanwa ry’Igikombe cy’Afurika [ TotalEnergies CAF Africa Cup of Nations Morocco 2025] ryaraye ritangiye ku mugaragaro, rigiye kongera kwigarurira amaso y’abarireba kubera umukino wa mbere mu itsinda uzahuza Afurika y’Epfo (Bafana Bafana) na Angola ku wa Mbere.

Uyu mukino ntufatwa nk’usanzwe, kuko amakipe yombi awufata nk’intangiriro izagena icyerekezo cyayo muri iri rushanwa riremereye, ririmo kandi Misiri na Zimbabwe.

Ikipe ya Afurika y’Epfo yageze i Marrakech nyuma y’urugendo rutoroshye rw’amasaha 26, inyura i Dubai na Casablanca.

Umutoza wayo, Hugo Broos, yatangaje ko urugendo rwari rurerure kandi ruvunanye,gusa yashimangiye ko ibyo bidashobora kuba impamvu yo kwitwaza, asaba abakinnyi be kwinjira mu mukino biteguye gutsinda.

Broos yavuze ko nubwo gutsinda umukino muri AFCON bigoye nubwo hari icyizere gihari. Yagaragaje ko mu myaka ishize ikipe ye yagiye igaragaza ukwitwara neza, kandi ko intego ari ukuza kurushaho kwitwara neza .

Yongeyeho ko imyiteguro itari yoroshye bitewe n’uko abakinnyi bamwe batinze kugera mu mwiherero, ariko ubu byose byamaze gukemuka, umwuka mu myitozo ukaba umeze neza.

INDI NKURU WASOMA BIFITANYE ISANO :AFCON2025 -Ibrahim Diaz yafashije Maroc gutangirana intsinzi

Kapiteni wa Afurika y’Epfo, Ronwen Williams, yavuze ko nubwo ikipe yabo imaze imyaka ibiri idatsindwa, AFCON y’uyu mwaka ifite urwego rwo hejuru kurushaho. Yasabye bagenzi be kongera imbaraga no kwitanga, kuko nta mukino uzoroha.

Ku ruhande rwa Angola, umutoza Patrice Beaumelle yagaragaje ko bahura n’ikipe ifite icyizere n’ihagaze neza, ariko ko Palancas Negras badafite ubwoba. Yavuze ko Angola ishobora kugora ikipe iyo ari yo yose, kandi ko intego yabo ya mbere ari ugutangira neza no kuva mu itsinda.

Kapiteni wa Angola, Fredy Ribeiro, yashimangiye ko gutsinda umukino wa mbere ari ingenzi cyane. Yavuze ko nubwo gutsinda Afurika y’Epfo byaba ari byiza, n’iyo bitakunda hakiri indi mikino ibiri yo kugera ku ntego yabo.