AFCON2025 -Ibrahim Diaz yafashije Maroc gutangirana intsinzi

Ikipe y’igihugu ya Maroc yakiriye Igikombe cya Afurika cya 2025 yatangiranye irushanwa intsinzi ifite agaciro, nyuma yo gutsinda Comoros ibitego 2-0 mu mukino wafunguye irushanwa wabereye i Rabat.

Maroc yatangiye isatira hakiri kare, ibona amahirwe akomeye ku munota wa 11 ubwo Brahim Diaz yagushwaga mu rubuga rw’amahina.

Gusa penaliti yatewe na Soufiane Rahimi yahagaritswe neza n’umunyezamu wa Comoros, Yannick Pandor, bituma abafana b’Intare za Atlas bacika intege by’akanya gato. Comoros yahise yisuganya, igumana umupira inyuma, ikabuza Maroc kubona inzira igana mu izamu mu gice cya mbere.

Mu gice cya kabiri, Maroc yagarutse ifite imbaraga nshya. Ku munota wa 55, Noussair Mazraoui yacishije umupira mwiza mu rubuga rw’amahina, Brahim Diaz awufata atisanzuye awushyira mu izamu, bituma abafana barenga ibihumbi 60 bari muri Stade Prince Moulay Abdellah basagwa n’ibyishimo bidasanzwe.

Uyu mukino wahise ufata indi ntera, Comoros igerageza kwishyura ariko Rafiki Said ahagarikwa n’umunyezamu Yassine Bounou, naho Pandor yongeye kwerekana ubuhanga ahagarika ishoti rikomeye rya Mazraoui.

Icyakora, iminota 15 mbere y’uko umukino urangira, Ayoub El Kaabi winjiye asimbuye yatsinze igitego cyiza cyane cy’umutwe usimbukira hejuru, ashimangira intsinzi ya Maroc.

INDI NKURU WASOMA :AFCON izajya iba nyuma y’imyaka ine – Motsepe

Iyi ntsinzi ya Maroc ije ari ingenze nubwo itari ifite kapiteni wayo Achraf Hakimi, wari utarakira neza imvune yo mu kaguru, ndetse ikanabura Romain Saiss wagize imvune hakiri kare . Amanota atatu yafashije Maroc gukomeza amateka yo gutsinda imikino 19 yikurikiranya ku rwego mpuzamahanga.

Nubwo intangiriro ari nziza, umutoza Walid Regragui n’abakinnyi be bazi ko urugamba rukiri rurerure, aho bazahura na Mali mu mukino utaha uteganyijwe ku wa Gatanu, Irushanwa rirakomeje, amakipe akomeye nka Misiri na Afurika y’Epfo na yo agomba gutangira urugendo rwabo guhera ku munsi wejo.